Qıǵash ózenindegi lotos gúline joıylyp ketý qaýpi tónip tur

ATYRAÝ. QazAqparat – Atyraý oblysyndaǵy Qıǵash ózeninde ósetin lotos gúline joıylyp ketý qaýpi tónip tur. Sol sebepten, ol erekshe qorǵalatyn ósimidikter qataryna engizilýi múmkin, dep habarlaıdy QazAqparat tilshisi.

Atyraý oblysy ákiminiń orynbasary Jasulan Bısembıevtiń aıtýynsha, Atyraý oblysynda ekotýrızmdi damytýǵa qolaıly eki baǵyt bar. Bul – «Aqjaıyq» memlekettik tabıǵı rezervaty men Qıǵash ózeniniń saǵasyndaǵy lotos gúli ósetin alqap.

Al, Qıǵash ózeni Atyraý oblysy men Reseıdegi Astrahan óńiri arasyndaǵy shekara syzyǵynda aǵyp tur. Lotos gúli osy ózenniń saǵasyndaǵy shamamen 5 myń gektarǵa jýyq alqapta gúldeıdi. Qyzǵylt tústi lotostyń bıiktigi 150 sm deıin jetedi.

«Jyl saıyn álemde sırek kezdesetin lotos gúli ósetin alqapty tamashalaýǵa 1 myńǵa jýyq týrıst keledi. Osy rette gúldi julyp, syndyrý deregi kóbeıip barady. Sonyń saldarynan fenomenaldy alqap joıylyp ketý qaýpiniń aldynda tur. Sondyqtan, lotos alqabyn qorǵaý úshin qosymsha qadaǵalaý jumystaryn kúsheıtý qajettigin usynamyz. Osyǵan baılanysty Atyraý oblysynyń ákimdigi Ekologııa jáne tabıǵı resýrstar mınıstrligine atalǵan usynysty qarastyrý týraly suranys joldady», - dep habarlady Jasulan Bısembıev.

Eske sala ketelik, qazaqstandyq sýretshiler Qıǵash ózenindegi alyp gúldi kenepke beınelep jatqanyn jazǵan edik. Keıin lotos gúlin kenepke beınelegen sýretshiler týyndylaryn Atyraý mýzeıine tapsyrǵanyn habarlaǵan bolatynbyz.