Kıevtiń «Jýlıany» áýejaıynyń VIP-zaly jolaýshylarǵa toly
ASTANA. QazAqparat - «Jýlıany» áýejaıynyń eski termınalynyń VIP-zaly jolaýshylarǵa toly, dep habarlady áýejaıdaǵy oqıǵany kózben kórgenderdiń sózine silteme jasaǵan RBK. Ýkraına BAQ-nyń túrli málimetteri boıynsha, áýejaıda búgin birneshe ondaǵan VIP-reıster tirkelgen. Avtokólikterden jekemenshik ushaqtarǵa aýqymdy qoraptar tıelýde.
«VIP-reıster» arqyly ushyp ketip jatqandar jaıly áleýmettik jelilerde keńinen talqylanýda. «Kúzet basqarmasynyń brondalǵan mashınasymen kelgen adam termınalǵa eki aýyr sómkelerimen ótti», - dep jazady «Trıbýna» basylymynyń birinshi betinde bas redaktor Evgenıı Laýer. Onyń sózine qaraǵanda, osylaısha Joǵarǵy Radanyń vıtse-spıkeri Igor Kaletnık jáne kirister men jınaqtar mınıstri Aleksandr Klımenko ushyp ketken. Jýrnalıstiń derekteri boıynsha, olardyń árqaısysy ınkassatorlyq mashınalarmen ákelingen birneshe sómkeleri jáne chemodandarymen ketken.
Ushyp ketken jolaýshylardyń tizimin boljammen Twitter áleýmettik jelisin paıdalanýshy max seddon jarııalady. Onda Joǵarǵy rada depýtattarynyń attaryna uqsas esimder kezdesken.
Bıznesmen Rınat Ahmetovke tıesili Airbus A319-133X(CJ) №P4-RLA ushaǵy Hıtroý áýejaıyna qondy. Bul málimetter Flightradar24.com saıtynan alyndy, dep habarlady RBK-Ýkraına. Alaıda kásipkerdiń jolǵa shyqqany jaıly aqparat joqqa shyǵaryldy. «Rınat Ahmetov Ýkraınada. Ol qazir Donetskte. Ol Chehııaǵa da, Londonǵa da ketken joq», - dep málimdedi bıznesmenge tıesili «Sıstem Kepıtal Menedjment» kommýnıkatsııalar boıynsha dırektory Natalıa Emchenko.
Sonymen birge, Joǵarǵy Radanyń spıkeri Vladımır Rybaktyń Kıevtiń Jýlıany áýejaıynan ushyp ketkeni habarlanǵan bolatyn. Alaıda keıin jýrnalısterge onyń eshqaıda ketpegenin baspasóz qyzmetinen habarlaǵan.
20 aqpan kúni keshke qala turǵyndary «Borıspol» áýejaıyna baratyn joldy jaýyp tastady. Olar kólikterdi toqtatyp, tekserýde. Osylaısha, belsendiler halyq depýtattarynyń ushyp ketýine bóget bolmaq.
Taǵy bir jaǵynan 20 aqpan kúni qarapaıym qala turǵyndarynyń Kıevten ketkisi keletini jaıly kóptegen habarlamalar taratyldy. Shyǵar joldarda keptelister, al avtokólikterdiń janar-jaǵarmaı stansasynda uzyn-sonar kezekter oryn aldy.
