Kıevtegi dıplomatııalyq korpýsqa qazaqstandyqtardan evakýatsııalaý boıynsha ótinish túsken joq — SІM

ASTANA. KAZINFORM — QR SІM Resmı ókili Aıbek Smadııarov Ýkraınadaǵy jaǵdaıǵa qatysty túsinikteme berdi. Bul týraly vedomstvonyń baspasóz qyzmeti málim etti.

Onyń sózinshe, Qazaqstannyń Ýkraınadaǵy elshiligi shtattyq rejımde jumys istep keledi.

— Bizdiń Ýkraınadaǵy Elshiligimiz shtattyq rejımde jumys istep keledi. Syrtqy ister mınıstrliginde álemdegi jaǵdaıǵa monıtorıng jasaıtyn arnaıy Ahýaldyq ortalyq bar. Bizdiń málimetimizge sáıkes Kıevtegi sheteldik dıplomatııalyq korpýs óz jumysyn jalǵastyrýda jáne azamattaryn evakýatsııalap jatqan joq. Qazaqstandyqtardan da evakýatsııalaý boıynsha ótinishter túsken joq jáne qazirgi ýaqytta arnaıy ushaqtardy jiberý josparda joq, — dedi ol.

Sonymen qatar, Aıbek Smadııarov Ýkraınada qazir 300-ge jýyq Qazaqstan azamaty bolýy múmkin ekenin aıtty.

— Ózderińiz biletindeı, Ýkraınada soǵystyń jalǵasyp jatqanyna eki jyldan asty. Ketemin degen azamattar elden shyǵyp ketken. Biraq bizdiń esebimiz boıynsha Ýkraınada qazir 300-ge jýyq Qazaqstan azamaty bolýy múmkin. Naqty sanyn aıtý qıynǵa soǵady. Oǵan qaramastan, birneshe kún buryn biz Ýkraınadaǵy qazaqstandyqtarǵa el aýmaǵynan ketý týraly habarlama jasadyq. Qazaq dıplomattary óz jumysyn tııanaqty atqaryp keledi, eger otandastarymyzdan ótinish túsken jaǵdaıda olarǵa barlyq qajet kómekti kórsetemiz. Degenmen, jaǵdaıdyń odan ári damýyna baılanysty óz áreketimizdi jasaımyz, — dedi SІM Resmı ókili.

Eske salsaq, buǵan deıin Prezıdent Ýkraınadaǵy ahýaldyń ýshyǵýyna baılanysty shuǵyl sharalar qabyldaýdy tapsyrǵany habarlandy.

Sondaı-aq, Premer-Mınıstr Ýkraına tóńiregindegi jaǵdaıǵa baılanysty shuǵyl jıyn ótkizdi.