Kıevtegi atys: alty adam qaza taýyp, kúdiktiniń kózi joıyldy
ASTANA. KAZINFORM – Senbi kúni Kıevtiń Goloseev aýdanynda belgisiz er azamat adamdarǵa oq jaýdyryp, saldarynan alty adam qaza tapty. Jergilikti bıliktiń habarlaýynsha, kúdikti bekinip alǵan sýpermarketke arnaıy bólimsheler shabýyl jasap, ony ustaý kezinde atyp óltirgen, dep habarlaıdy VVS.
Buǵan deıin bes adamnyń qaza tapqany habarlanǵan edi. Keıin aýrýhanada alǵan jaraqatynan taǵy bir áıel kóz jumdy.
Oqıǵa saldarynan zardap shekkender sany da artty. Qazirgi málimet boıynsha, túrli jaraqatpen 14 adam aýrýhanaǵa jetkizilgen. Barlyǵyna qajetti medıtsınalyq kómek kórsetilip jatyr. Tórt kepilge alynǵan adam qutqaryldy.
Ýkraına Qaýipsizdik qyzmeti bul oqıǵany «terrorıstik akt» retinde tergep jatqanyn málimdedi.
Cholovik, ıakıı vidkrıv strilıanıný v Kıєvi. Video z sotsmerej pic.twitter.com/BhMkYxjUqy
— Ýkraїnska pravda ✌️ (@ukrpravda_news) April 18, 2026
Kıev ákimi Vıtalıı Klıchko áleýmettik jelide Goloseev aýdanynda jaralanǵandardyń arasynda bala bar ekenin habarlady. Onyń aıtýynsha, dárigerler balany aýrýhanaǵa jetkizip jatyr, al eresekterge sol jerde kómek kórsetilip jatyr.
Polıtsııa málimetinshe, Natsıonalnaıa polıtsııa Ýkraıny arnaıy bólimsheleri – Jedel tosyn áreket etý korpýsy kúdikti jasyrynǵan dúkenge shabýyl jasaǵan. Ol adamdardy kepilge alyp, ustaý kezinde polıtseılerge oq atqan. Buǵan deıin onymen kelissóz júrgizýshiler baılanys ornatýǵa tyrysqan.
Aldyn ala derekterge sáıkes, er adam aldymen kóshede ótip bara jatqan adamdarǵa oq jaýdyryp, keıin Goloseev aýdanyndaǵy sýpermarkette adamdardy kepilge alǵan.
Ýkraınanyń Bas prokýrory Rýslan Kravchenko kúdiktiniń 58 jastaǵy Máskeý týmasy ekenin málimdedi.
Aıta keteıik, bıyl naýryzda Nıgerııada jankeshtiler jasaǵan birqatar terakt saldarynan 23 adam qaza tapty.
