Kıevte Qazaqstanda esirtki taratqan qylmystyq toptyń ortalyǵy quryqtaldy
ASTANA. KAZINFORM – Qazaqstan Respýblıkasynyń Іshki ister mınıstrligi Ýkraına Ulttyq polıtsııasymen jáne eki eldiń bas prokýratýralarymen birlesip, halyqaralyq qylmystyq toptardyń call-ortalyqtaryn joıý boıynsha arnaıy operatsııa ótkizdi. Bul týraly Polisia.kz jazdy.
– 28 mamyrda Kıev qalasynda Eýropa men TMD elderinde sıntetıkalyq esirtki óndirý jáne taratýmen aınalysqan qylmystyq uıymǵa tıesili call-ortalyqtardyń qyzmeti toqtatyldy. Tergeý barysynda bul ortalyqtardyń adamdardy esirtki bıznesine tartý úshin paıdalanylǵany anyqtaldy. Operatorlar men menedjerler Qazaqstan aýmaǵynda esirtki jasyrýshy jáne esirtki oraýshy róline adamdardy izdep, olardy zańsyz jumysqa qabyldaǵan, - dedi QR ІІM esirtki qylmysyna qarsy is-qımyl komıteti tóraǵasynyń orynbasary Eldar Ábdikenov.
Arnaıy operatsııa nátıjesinde 11 adam ustaldy. Olardyń arasynda uıymdastyrýshylar, operatorlar jáne adamdardy zańsyz jumysqa tartýmen aınalysqan qyzmetkerler bar. Toǵyz mekenjaıda tintý júrgizilip, shamamen 40 myń AQSh dollary, 10 myń eýro, Range Rover avtokóligi, 18 uıaly telefon, 12 noýtbýk pen planshet tárkilendi.
– Qazir tárkilengen tehnıkadaǵy málimetter zerttelip jatyr. Sonymen qatar uıymdastyrýshylardyń akkaýnttary anyqtalyp, qarjylyq tergeý júrgizilýde, - dedi spıker.
Bul call-ortalyqtardyń jabylýy Qazaqstan azamattaryn esirtki qylmystaryna tartý faktilerin azaıtyp, halyqaralyq esirtki bıznesin uıymdastyrýshylardy jaýapqa tartýǵa múmkindik beredi.
Eske salsaq, budan buryn Іshki ister organdary qyzmetkerlerine arnalǵan jańa ádistemelik quraldar tanystyrylǵanyn jazǵan edik.
