Kıevte Qazaqstan men Ýkraınanyń bıznes-forýmy ótedi

NUR-SULTAN. QazAqparat – Kıev qalasynda Qazaqstan - Ýkraına bıznes-forýmy ótedi, dep habarlaıdy QazAqparat Ýkraınadaǵy Qazaqstan elshiligine silteme jasap.

«2020 jyldyń 20 shildesinde Qazaqstan Respýblıkasynyń Ýkraınadaǵy elshisi Darhan Káletaev pen Ýkraınanyń Ekonomıka, saýda jáne aýyl sharýashylyǵyn damytý mınıstri Igor Petrashkonyń kezdesýi ótti. Olar saýda-ekonomıkalyq yntymaqtastyqty odan ári tereńdetýge, birlesken bıznes-jobalardy júzege asyrýǵa jáne kólik dálizderin damytýǵa qatysty birqatar máselelerdi talqylady.

Taraptar saýda-ekonomıkalyq yntymaqtastyq jónindegi Qazaqstan -Ýkraına birlesken memleketaralyq komıssııasynyń jáne Taýar aınalymyn arttyrý jónindegi jumys tobynyń otyrystaryna belsendi daıyndyqty bastaýǵa ýaǵdalasty. Osy is-sharalar qarsańynda Kıevte Qazaqstan - Ýkraına bıznes-forýmy uıymdastyrylady», - dep habarlady Ýkraınadaǵy Qazaqstan elshiligi.