Kıevte qazaq tilin meńgerý klýby ashyldy

ASTANA. QazAqparat - Ýkraınanyń Kıev qalasynda qazaq tilin úıretý klýby ashyldy, dep xabarlaıdy QazAqparat tilshisi QR Syrtqy ister mınıstrliginiń baspasóz qyzmetine silteme jasap.

Resmı aqparatqa sáıkes, atalǵan klýb Jambyl Jabaev atyndaǵy qoǵamdyq kitaphananyń janynan ashylyp otyr. Al ondaǵy sabaqtar qazaq dıasporasy ókilderiniń balalary úshin ótkiziledi. Kýrs baǵdarlamasynda qazaq tiliniń grammatıkasy men leksıkasy, sondaı-aq qazaq halqynyń uly oıshyldarynyń eńbekterimen tanystyrý sabaqtary kózdelgen. Qazaqstannyń mádenı-tarıhı murasy, ekonomıkasy men qoǵamdyq-saıası ómirine qatysty arnaıy dáristerdi ótkizý de josparda bar.

Klýbtyń ashylý saltanatyna qatysqan qazaq dıasporasynyń ókilderi týǵan tilderiniń shet elde úırenýge berilgen múmkindik úshin óz alǵystaryn bildirdi.