Kıevte deepfake tehnologııasyn qoldanǵan transulttyq call-ortalyq joıyldy

ASTANA. KAZINFORM – Qazaqstan Іshki ister mınıstrliginiń Kıberqylmysqa qarsy is-qımyl departamenti Ýkraına Ulttyq polıtsııasymen, Bas prokýrorynyń keńsesimen jáne Qazaqstannyń Bas prokýratýrasymen birlesip Kıev qalasynda iri arnaıy operatsııa júrgizdi. Nátıjesinde transulttyq qylmystyq top qurǵan alaıaq call-ortalyqtyń qyzmeti toqtatyldy, dep habarlaıdy Polisia.kz.

Tergeý barysynda jalǵan onlaın-brokerler arqyly ınvestıtsııany «qaıtaryp beremiz» degen syltaýmen áreket etken qylmystyq top áshkerelendi. Olar Qazaqstan, Eýropalyq Odaq jáne TMD elderiniń azamattaryna habarlasyp, ózderin zańger retinde tanystyrǵan. Jalǵan qujattar jiberip, «sot» nemese «salyq organdary» atynan sóılesken. Bet-beınesin jasyrý úshin deepfake tehnologııalaryn qoldanǵan.

Alaıaqtar jábirlenýshilerdi «komıssııa», «sot shyǵyny» nemese «salyq» tóleýge májbúrlep, keıbir jaǵdaılarda nesıe alýǵa nemese múlikti satýǵa da kóndirgen.

Aldyn ala derekter boıynsha, 4,5 myńnan astam sheteldik azamat zardap shekken, olardyń ishinde qazaqstandyqtar da bar. Keltirilgen shyǵyn 4 mln AQSh dollarynan asqan.

Qylmystyq top naqty ıerarhııa boıynsha jumys istegen: ınvestorlar men úılestirýshiler, tehnıkalyq basshylar jáne jábirlenýshilermen baılanys ornatqan operatorlar bolǵan. Zańsyz tabystar elıtalyq jyljymaıtyn múlikke, qala syrtyndaǵy jer telimderine jáne qymbat avtokólikterge jumsalǵan. Call-ortalyqta shamamen 30 adam «eńbek etken».

11 mekenjaı men call-ortalyqtyń ózinde júrgizilgen tintýler barysynda 41 kompıýter, 24 uıaly telefon, sim-kartalar jáne basqa da dálelder tárkilendi. Qurylǵylardan qazaqstandyq baılanys operatorlarynyń abonenttik derekter bazasy tabyldy.

Arnaıy operatsııa barysynda 15 Ýkraına azamaty ustaldy, onyń 9-y ýaqytsha ustaý ızolıatoryna qamaldy.

«Bul birlesken is-shara transulttyq kıberqylmysqa eleýli soqqy berdi. Іri uıymdasqan toptyń joly kesilip, azamattardy alaıaqtyq shemalarǵa tartýdyń aldyn alýǵa múmkindik týdy», – dedi QR ІІM Kıberqylmysqa qarsy is-qımyl departamenti bastyǵynyń orynbasary Aslan Óskembaev.

Aıta keteıik, Almatyda polıtsııa alaıaqtardy SIM-kartalarmen qamtamasyz etken topty ustady.