Kıevte 11 adamdy óltirgen ózbekstandyq ómir boıyna bas bostandyǵynan aıyryldy
ASTANA. KAZINFORM — Aıyptalýshynyń 3 áıel men 8 er adamnyń ómirin qıǵany anyqtaldy. Bul týraly Uznews.uz saıty qalalyq prokýratýranyń baspasóz qyzmetine silteme jasap habarlady.
Kıevte Goloseev aýdandyq sotynyń alqasy 2018 jyldyń aqpany men 2024 jyldyń qańtary aralyǵynda 11 adamdy óltirgen jáne bir adamdy óltirýge oqtalǵan Ózbekstan azamatyn ómir boıyna bas bostandyǵynan aıyrý jazasyna kesti.
Er adam 2024 jyldyń qańtarynda Kıevtiń Goloseev aýdanyndaǵy gúl satatyn dúkenge tapsyrys berýshiniń atyn jamylyp kirip, satýshyǵa 30 retten astam pyshaq suqqan. Kisi óltirgennen keıin ol jábirlenýshiniń altyn buıymdaryn alyp, qashyp ketken, biraq keıin ustalǵan.
Jaýap alý kezinde ol kisi óltirgenin moıyndap, osyǵan uqsas qylmystar týraly egjeı-tegjeıli aıtyp berdi. Onyń qurbandary negizinen ol kezdesken úısiz adamdar boldy. Olarmen birge spırttik ishimdik iship, keıin olardy óltirgen. Marqumdardyń máıitteri ólimniń naqty jaǵdaılary men sebepterin anyqtaý óte qıyn ýaqyttan keıin tabyldy.
Aıyptalýshy qurbandarynyń árqaısysyn eske alyp, egjeı-tegjeıli moıyndaý jazany jeńildetýge kómektesedi dep úmittengeni atap ótildi.
Sot usynylǵan dáleldemelerdi saraptap, er adamdy kináli dep tanyp, oǵan eń joǵarǵy jaza — ómir boıyna bas bostandyǵynan aıyrý jazasyn taǵaıyndady. Ol qazir qamaýda otyr.
Eske sala keteıik, Ystambulda ózbekstandyq áıel kúıeýin pyshaqtap óltirdi.