Kıev áýejaıynda qyz balany qutqarǵan jigit Ulttyq ulannyń sarbazy bolyp shyqty
NUR-SULTAN. QazAqparat - Kıev áýejaıynda kishkentaı balany qutqaryp qalǵan jigit QR Ulttyq ulanynyń serjanty bolyp shyqty, dep habarlaıdy QazAqparat tilshisi.
«Kýdıenko Alekseı Aleksandrovıch 2010-2017 jyldary Shymkent qalasyndaǵy 6506-áskerı bólimshede qyzmet etken. Ol materıaldyq-tehnıkalyq qamtamasyz etý rotasynyń avtomobıl vzvodynyń aǵa júrgizýshisi bolǵan. 2017 jyldyń tamyzynan beri Almaty qalasyndaǵy apparatýralardy jóndeý jáne baılanys óńirlik ortalyǵynyń mamany bolyp jumys isteıdi», - dep málimdedi QR Ulttyq ulanynyń baspasóz qyzmeti.
Ulttyq ulannyń Bas qolbasshylyǵy A. Kýdıenkomen telefon arqyly baılanysqanyn jetkizdi.
«Onymen telefon arqyly sóılestik. Qazir ol poıyzben úıge qaıtyp jatqan bolý kerek», - delingen habarlamada.
Aıta keteıik, osyǵan deıin Shymkent turǵynynyń Kıev áýejaıynda kishkentaı qyz balany qutqaryp qalǵandyǵy týraly jazdyq.
