«Kıev-Almaty-Kıev» baǵytynda ýaqytsha áýereısi ashyldy
ASTANA. 6 maýsym. QazAqparat - QR Kólik jáne kommýnıkatsııa mınıstrligi «MAÝ» áýekompanııasyna 2012 jylǵy 10 shildege deıin Kıev - Almaty - Kıev baǵytynda ushý saparyn júzege asyrýǵa ýaqytsha ruqsat berdi, dep habarlaıdy vedomstvonyń baspasóz qyzmeti.
«QR Kólik jáne kommýnıkatsııa mınıstrligi «Ýkraına halyqaralyq áýejelisi» («MAÝ») áýekompanııasyna 2012 jylǵy 6-shy maýsym men 10-shy shilde aralyǵynda Kıev - Almaty - Kıev baǵytyndaǵy ushý saparlaryn ýaqytsha júzege asyrýǵa ruqsat berdi. Mundaı sheshimdi Qazaqstannyń áýe bıligi fýtboldan ótetin Evropa chempıonatyna baılanysty atalǵan ushý saparlaryna bılet satyp alǵan jolaýshylar tarapynan túsinispeýshilikti boldyrmaý maqsatynda qabyldap otyr», - delingen habarlamada.
Esterińizge salyp óteıik, QR KKM Azamattyq avıatsııa komıteti Ýkraınalyq áýekompanııasyna atalǵan baǵytqa jaz mezgilinde ushý saparyn júzege asyrýǵa ruqsat bergen joq. Sebebi ruqsat berýge qajetti qujattar tizimin atalǵan kompanııa tolyq usynbaı otyr.
«MAÝ» áýekompanııasy Kıev - Almaty - Kıev baǵytyndaǵy turaqty reısterge ruqsat almaı turyp, aldyn ala bılet satýdy júzege asyrǵanyn atap ótý kerek.
