Kıev AQSh kóshbasshylarynyń sammıtin qańtardyń sońyna deıin ótkizýdi josparlap otyr – Zelenskıı

ASTANA. KAZINFORM - Ýkraına qańtar aıynyń sońyna deıin Reseı Federatsııasymen shıelenisti retteý boıynsha beıbitshilik josparyn talqylaý úshin AQSh-ta kóshbasshylardyń sammıtin ótkizýdi josparlap otyr, dep habarlaıdy Anadolu.

Bul týraly Ýkraına prezıdenti Vladımır Zelenskıı Kıevte jýrnalıstermen bolǵan baspasóz máslıhatynda málim etti.

Ol Kıevte Ýkraınanyń kepildigin qamtamasyz etý baǵytynda jumys istep jatqan eýropalyq memleketterdiń basshylarymen kezdesý ótkenin aıtty.

Onyń sózinshe, 5 qańtarda seriktes elderdiń qarýly kúshteri bas shtabtary bastyqtarynyń deńgeıinde taǵy bir májilis ótkizý josparlanyp otyr. Onda basty taqyryp qaýipsizdik kepildigi máselesi bolady.

Zelenskıı sonymen qatar 6 qańtar kúni Parıjde «Nıet bildirýshi koalıtsııa ókilderi» elderi kóshbasshylarynyń kezdesýi ótetinin málim etti etti. Oǵan AQSh delegatsııasy da qatysady.

- Odan soń kóshbasshylar kezdesip, kepildik boıynsha qujattardy sońǵy nusqasyna deıin jetkizedi, - dedi Ýkraına kóshbasshysy.

Zelenskıı Parıj sammıtiniń bir nemese eki kúnge sozylatynyn aıtty.

- Osydan soń menińshe, AQSh kóshbasshylarynyń keń aýqymdy kezdesýine daıyndalamyz degen oıdamyn. Biz osynyń barlyǵyn qańtar aıynyń sońyna deıin ótkizsek degen oıdamyz,-dedi Ýkraına prezıdenti.

Osyǵan deıin  AQSh Ýkraınaǵa 15 jyldyq qaýipsizdik kepildigin usynǵany týraly jazdyq.