Kıeli jerlerdiń mártebesi zańmen bekitiledi

ASTANA. QazAqparat - Elimizde aldaǵy ýaqytta tarıxı nysandardy qorǵaý zańnamasyna ózgerister engiziledi, dep xabarlaıdy QazAqparat tilshisi.

«Kıeli Qazaqstan» ǵylymı-zertteý ortalyǵynyń basshysy Berik Ábdiǵalıulynyń aıtýynsha, tarıxı-mádenı nysandar týraly zańda kıeli jerlerdiń naqty mártebesi jazylady. «Qasıetti jerler» degen arnaıy tarmaq bolady. Oǵan deıin memlekettik tizilim jasalady. Atalǵan tizilimdi quzyretti organ - Mádenıet jáne sport mınıstrligi jasaıdy da, árbir nysannyń ǵylymı-saraptamalyq tólqujatyn engizedi. Al tarıxı nysannyń tólqujaty bolyp, tizilimge ense, onyń naqty mártebesi bolady degen sóz», - dedi B.Ábdiǵaluly «Qazaqstannyń kıeli jerleriniń geografııasy» II respýblıkalyq forýmynda.

Ǵalymnyń aıtýynsha, osymen kıeli jerlerdi anyqtaý jumysy aıaqtalyp otyrǵan joq. Zertteýler jalǵasa beredi. Talqylaý sharalary da júredi. Soǵan qaraı kıeli jerlerdiń tizimine ózgerister engizilip turady. «Bizdiń saraptamalyq keńesimizde tizim maquldandy. Degenmen, tolyqtyrý, izdestirý jumysy jalǵasa beredi», - dep atap kórsetti B.Ábdiǵalıuly.

Aıta keteıik, búgingi forým aıasynda «Rýxanı jańǵyrý» zaly ashyldy.  Forýmnyń basynda  jalpyulttyq jáne aımaqtyq mańyzy bar tarıxı nysandarǵa arnalǵan eki jınaq tanystyryldy.  Sol jerde «Kıeli Qazaqstan» ǵylymı-zertteý ortalyǵynyń basshysy Berik Ábdiǵalıuly tarıxı nysandardy irekteý jumysynyń qalaı júrgizilgenin, ne úshin ǵylymı dáıekterge ǵana emes, ańyz-áńgimelerge de basymdyq berilgenin aıtyp berdi.