Kıeli jerlerdi aralaǵany úshin «altyn» beriledi
Kompanııa tóraǵasynyń orynbasary Qaırat Sádýaqasovtyń aıtýynsha, aldaǵy ýaqytta «Pokemon Go» oıyny negizinde otandyq kvest jasap shyǵarý josparlanǵan. Sonyń negizinde Qazaqstannyń kıeli jerlerin aralap qana qoımaı, upaı jınaýǵa bolady. Artynan sonyń bárin jeńildikke aıyrbastaýǵa múmkindik bar. Tipti, «xan» dárejesine deıin ósýge bolady.
«Aldymen barlyq kıeli jerlerdiń elektrondy nusqasy ázirlenedi. Sonyń negizinde úlken kvest jasaý oıymyzda bar. Oıynshyǵa upaı da beriledi. Máselen, Ulytaýǵa, ıa bolmasa, basqa bir kıeli jerge barsań, sol úshin upaı esepteledi. Kvest-saıaxattyń geografııasy keńeıgen saıyn upaıdyń sany kóbeıdi. Upaıdyń shartty ataýy -«altyn». Altyndardy sanalýan jeńildikterge aıyrbastaýǵa múmkindik bar. Máselen, áýekompanııasy ekonom-klastyń ornyna bıznes-klasty bere alady, ıa bolmasa, júkti tegin jetkizedi. Upaıdan bólek árbir adamnyń jeke statýsy bolady. Oıynda aldymen «ulan» bolasyń, odan keıin «sultan», sóıtip, «xan»degen mártebege deıin ósýge múmkindik bar. Ondaı adamdarǵa arnaıy jeńildikter beriledi», - dedi Q.Sádýaqasov QazAqparat tilshisine bergen suxbatynda.
Onyń aıtýynsha, atalǵan joba - týrızmdi damytý sharalarynyń biri. Negizgi maqsat - jańa texnologııalar arqyly jastardy qyzyqtyrý, týǵan eldiń kıeli jerlerin aralaýǵa degen yntasyn arttyrý.
«Árıne, bir oıynmen barlyq máseleni sheshe almaımyz. Bizge áleýmettik jarnamany kúsheıtý kerek. Aımaqtardyń týrızmge jaýapty adamdary basqa óńirlerge baryp, óz oblysyndaǵy týrıstik oryndarǵa jarnama jasaýy qajet. Sóıtip, týrısterdi kóptep tartqany jón. Negizi, buryn biz ishki týrızmdi biryńǵaı naryq dep qarastyrdyq. Olaı emes. Іshki naryqta da báseke bar. Máselen, Astana týrısterdi kóptep tartý úshin Almaty qalasymen básekelesedi. Sol sııaqty Shymkent te osy básekege qosylyp otyr. Mańǵystaý bar. Aımaqtar xalyqqa aqparatty kóbirek berse, ishki týrızm jandana túsedi», - dep atap kórsetti Q.Sádýaqasov.
