«Kıeli tabıǵat»: Qazaqstanda qorshaǵan orta máselesine arnalǵan You Tube arnasy ashyldy

NUR-SULTAN. QazAqparat – Elimizde qorshaǵan ortany qorǵaý men ekologııalyq máselelerge arnalǵan «Kıeli tabıǵat» atty jańa You Tube arnasy iske qosyldy, dep habarlaıdy QazAqparat tilshisi.

«Búgin «Kıeli tabıǵat» respýblıkalyq ekologııalyq jobasy aıasynda jańa You Tube arnasyn iske qostyq. Atalǵan ınternet keńistiginde qaldyqtardy suraptaý men basqa da eko ádetterge baýlıtyn beınerolıkter, beınesabaqtar jarııalanatyn bolady. Ondaǵy maqsat – óskeleń urpaqtyń ekologııalyq saýattylyǵyn arttyrý. Sondaı-aq, «Kıeli tabıǵat» You Tube arnasynda qoǵamdaǵy ótkir ekologııalyq taqyryptarǵa arnalǵan áleýmettik beınerolıkter de oryn alady. Memleket basshysy Qasym-Jomart Toqaevtyń ózi halyqtyń ekologııalyq saýattylyǵyn arttyrý kerektigin birneshe ret basa aıtqan bolatyn. Osy oraıda jumysty jasóspirimderden bastaǵan jón», - dedi «Jas Ulan» biryńǵaı balalar men jasóspirimder uıymynyń tóraǵasy Dınara Sádýaqasova.

Onyń aıtýynsha, qoǵamnyń ekologııalyq saýattylyǵyn arttyrý qozǵalysyna kópshilik qaýymǵa tanymal eko-ambassadorlar, belsendiler sonymen qatar qoǵamdyq uıymdar jumyldyrylady.

Odan bólek, uıym basshysy atalǵan jobany júzege asyrýda jasulandyqtardyń belsendi ról atqaratynyn erekshe atap ótti.

«Jasulandyqtardyń qatysýymen osyǵan deıin de birneshe qorshaǵan ortany qorǵaý, saqtaý taqyrybyna arnalǵan aktsııalar men senbilikter uıymdastyryldy. Sońǵy 1 aıdyń ishinde 800 myńnan astam jasóspirim ekologııalyq aktsııaǵa qatysty. Aldaǵy ýaqytta «Balapan» telearnasymen birlesip qorshaǵan ortaný aıalaý taqyrybyna arnalǵan mýltfılm men telebaǵdarlama túsirý josparymyzda bar», - deıdi ol.

Aıta ketsek, búgin tusaýy kesilgen «Kıeli tabıǵat» jobasy QR Aqparat jáne qoǵamdyq mınıstrligi men Azamattyq bastamalardy qoldaý ortalyǵynyń demeýshiligimen júzege asyrylyp jatyr.