Kıeli óner arqyly qalyń qazaqty tárbıelegen Júsekeń sııaqty iri tulǵalar qashanda úlken qurmetke laıyq - Q. Bóribekov
ALMATY. 8 qazan. QazAqparat /Ádilet Musahaev/ - Qazaqtyń mýzyka áleminde óshpesteı iz qaldyrǵan, án salýdyń bir tutas mektebin qalaǵan J.Elebekov qazaq ónerindegi dara tulǵa.
Bul jóninde QR Bilim jáne ǵylym mınıstrliginiń tehnıkalyq jáne bilim departamentiniń dırektory Qadirbek Bóribekov ánshi eskertkishiniń ashylý rásimi kezinde aıtty.
«Kemeńger Muhtar Áýezov «Júsipbek halyq ánderiniń sheber akademıgi ǵana emes, ol adamgershiliktiń de akademıgi» dep ony joǵary baǵalaǵan. Kıeli óner arqyly qalyń qazaqty tárbıelegen Júsekeń sııaqty iri tulǵalar qashanda úlken qurmetke laıyq. Óner súıer qaýym men keleshek urpaǵymyz bul ánshiniń ónerge qosqan úlesin árqashan este saqtaıdy, eshqashan umytpaıdy», -dedi Q. Bóribekov
Eskertkishtiń avtory, músinshi Málik Keńesbaev músindi salýǵa jarty jyldaı ýaqyt ketkendigin jáne ánshiniń beınesin sıpattaıtyn materıaldar men ol kisi týraly aqparat jınaǵandyǵyn aıtady. «Músindi salý barysynda ol kisiniń kózin kórip, birge qyzmettes bolǵan adamdardyń áńgimelerin tyńdap, ánshiniń túr-tulpatyn beıneledik. Jalpy músinniń bıiktigi 4,20 metr», - deıdi músinshi.
