Kıeli dombyranyń 20-dan astam túrleri bar - professor Jolaýshy Turdyǵulov
ALMATY. 13 maýsym. QazAqparat - Dombyra qazaq halqynyń saz aspaptarynyń ishinde shoqtyǵy bıik, ereksheligimen dara kórinetin aspaby.
Abaı atyndaǵy Qazaq ulttyq pedagogıkalyq ýnıversıtetiniń kórkemsýret fakýltetiniń sándik qolóner kafedrasynyń professory Jolaýshy Turdyqulovtyń aıtýynsha, ol el arasyna keń taraǵan, túrli shejirege baı jáne erteden kele jatyr.
«Qazirgi kezde dombyranyń 20-dan astam túrleri bar. Olardyń ishinde - án men kúı dombyrasy, torsyq, tumar, keń shanaqty (eki nusqasy), baldyrǵan, balashyq, shińkildek, asha, úsh ishekti, qýys moıyn, sherter, orkestr dombyralary: qońyr daýysty (alt), jińishke daýysty (prıma), aşy daýysty (sekýnda) bas dombyralar (eki nusqasy) bar», - deıdi QR mádenıet qaıratkeri J. Turdyǵulov. Sheber-ustazdyń aıtýynsha, dombyra jasaýdyń qyr-syry ǵasyrlar boıynda atadan balaǵa, ustazdan shákirtke berilip kele jatqan asyl mura. Beınet túbi-bereke demekshi, tabandy izdenister men qajyrly jumystar dombyra jasaýshyny sheberliktiń shyńyna jeteleıdi.
«Dombyra - án men kúıdi týdyrýshy mýzkalyq aspap bolsa, kúı men án-jyr ata-babamyzdan qalǵan qazyna. Al halyqtyq dástúrli óner - qazirginiń burynǵy kózi. Ǵasyrdan ǵasyrǵa ózgermesten qaz-qalpynda urpaqtan urpaqqa berilip kele jatqan tiri dástúr. Ol eshqandaı ǵasyrdyń aǵymyna qaraı eshqandaı ekologııalyq, ekonomıkalyq, ǵylymı-tehnıkalyq qıyndyqqa ushyramaýy kerek. Halyqtyq qolóner - halyqtyń jan dúnıesinen paıda bolǵan, kórkem oılar álemi», - dedi Jolaýshy Turdyǵulov.
