«Kıeli Astana» kartasy daıyndalady

ASTANA. QazAqparat - Astana ákimdiginde qala ákiminiń orynbasary Ermek Amanshaevtyń tóraǵalyǵymen «Rýhanı jańǵyrý» baǵdarlamasynyń júzege asýy boıynsha jınalys ótti, dep habarlaıdy elorda.info .

Baǵdarlama jobalarynyń biri - Qazaqstan astanasynyń tarıhı-mádenı muralaryn biriktiretin «Kıeli Astana» kartasy bolmaq.

Ermek Amanshaevtyń aıtýynsha, Astana ólkesinde kóne túrik kezeńine jatatyn arheologııalyq nysandar bar. Demek, bul elordadaǵy barlyq eskertkishter «kıeli kartaǵa» enýi kerek jáne tarıhı-mádenı muralardy tereńinen zertteý úshin jumys toby qurylýy tıis degendi bildiredi. Onyń quramynda bizdiń ǵalymdar, arheologtar, tarıhshylar, úkimettik emes jáne jastar uıymdarynyń ókilderi bolady.

- Jalpy, «Kıeli Astana» elorda ómiriniń birneshe komponentterin biriktiredi. Óıtkeni kıeli karta - bul bir jaǵynan, ólke tarıhyn zertteýdiń baǵa jetpes kózi, ekinshiden, óz jerine, elordasyna degen syılastyq pen patrıottyq sezimniń qalyptasýyna negiz bolady. Úshinshiden, týrıstik klasterdiń kreatıvti quramy bolýy kerek. Sondyqtan da «Rýhanı jańǵyrý» baǵdarlamasy boıynsha jumystardy jandandyrý qajet, - dedi Ermek Ámirhanuly.

Mundaı sharalardyń ishinde «Bozoq» qalashyǵyna mádenı-ǵylymı ekspedıtsııa jasaý, jas ólketanýshylardyń qalalyq sleti men forýmy, bilim mekemelerinde «Týǵan jer - rýhanı jańǵyrý» taqyrybynda synyp jáne kýratorlyq saǵattar ótkizý, taǵy da basqalar.

Sonymen qatar jınalysta Astananyń jas patrıottar klýby men qalanyń «Rýhanı jańǵyrý» shyǵarmashylyq ıntellıgentsııasynyń keńesin qurý aıtyldy. Top quramynda mádenıettanýshylar, tarıhshylar, óner qaıratkerleri, arheologtar jáne qalanyń talantty, jasampaz jastary bolady.