Kıeli jerler — ózara qurmet pen halqymyzdyń mádenı sanalýandyǵynyń sımvoly - Prezıdent
ASTANA. KAZINFORM — Kıeli jerler ózara qurmet pen halqymyzdyń mádenı sanalýandyǵynyń sımvoly. Bul týraly Álemdik jáne dástúrli dinder kóshbasshylary VIII Seziniń jalpy otyrysynda Memleket basshysy Qasym-Jomart Toqaev aıtty.
— Qazaq dalasynda álemdegi eń negizgi dinder men konfessııalardyń barlyǵy derlik taraǵan jáne bir-birimen jarasym tapqan. Biz qazirgi Qazaqstanda da osy ıgi dástúrdi saqtap, odan ári damytýǵa bar kúsh-jigerimizdi salamyz. Elimizdiń etnosaralyq jáne dinaralyq kelisimdi nyǵaıtýda tájirıbesi mol. Qazaqstannyń etnostyq ári dinı toleranttyq modeli «Birligimiz — áralýandyqta» qaǵıdatyna súıenedi. Bul ustanym tipti álemdik ólshem turǵysynan biregeı sanalatyn Qazaqstan halqy assambleıasynyń qyzmetinde de kórinis tapqan. Tarıhtyń ózi qalyptastyrǵan halqymyzdyń tózimi, yntymaq-birligi men keń dúnıetanymy búginde elimizdiń beıbitsúıgish, teńgerimdi syrtqy saıasatynan anyq ańǵarylady. Bul saıasat senimge, dıalogqa jáne yntymaqtastyqqa negizdelgen. Jalpyǵa ortaq osy qundylyqtar men qaǵıdattar barsha halyqtar men memleketter úshin de mańyzdy ekenine senimim kámil, — dedi Prezıdent.
Qasym-Jomart Toqaev keshe Sezd aıasynda BUU Órkenıetter alıansynyń dinı nysandardy qorǵaý jóninde arnaýly sessııasy uıymdastyrylǵanyn atap ótip, jahandaǵy gýmanıstik kún tártibin ilgeriletýge sińirgen eńbegi úshin Alıanstiń joǵary ókili Mıgel Anhel Moratınosqa rızashylyǵyn bildirdi.
— Kıeli dinı oryndar men nyshandardy qorǵaý arqyly biz, shyn máninde, adamzat órkenıetiniń qaınar kózin saqtaımyz. Qazaqstanda 18 konfessııaǵa tıesili tórt myńǵa jýyq dinı birlestik bar. Biz ıÝNESKO-nyń Búkilálemdik muralar tizimine engen Qoja Ahmet ıAsaýı kesenesi sekildi kıeli jerlerdi, ertede jáne qazirgi zamanda boı kótergen meshitterdi, pravoslavıe men katolık shirkeýlerin, Almatydaǵy býdda ortalyǵy men «Beıt Rahel Habad Lıýbavıch» sııaqty sınagogalardy qorǵap, qoldaý kórsetemiz. Memleket dinı qaýym úshin erekshe mańyzǵa ıe barlyq qasıetti oryndardyń saqtalýyn óz qamqorlyǵyna alǵan. Mańǵystaýdaǵy Beket ata meshiti, Іle ózeniniń jaǵasyndaǵy Tamǵaly tas býdda petroglıfteri, Almatydaǵy Levı-Ishak Shneersonnyń qabiri, katolıkter aıryqsha ardaqtaıtyn Soltústik Qazaqstandaǵy Márııamkól — osynyń jarqyn mysaly. Kıeli jerler nanym-senimi ártúrli adamdardy biriktirip, urpaqtar sabaqtastyǵy men rýhanı baılanysty saqtaıdy. Sondyqtan biz úshin bul jaı ǵana sáýlettik nemese tarıhı eskertkish emes, beıbitshiliktiń, ózara qurmet pen halqymyzdyń mádenı sanalýandyǵynyń sımvoly, — dedi Qasym-Jomart Toqaev.
Astanada Álemdik dinder kóshbasshylarynyń sezi ótip jatyr.
Іs-shara barysynda Qasym-Jomart Toqaev din basshylaryn beıbitshilik elshileri dep atady.