Kids Go Free: 5,5 myń bala elimizdi tegin saıahattady

ALMATY. KAZINFORM – Sońǵy úsh jylda Kids Go Free balalarǵa arnalǵan saıahattaý baǵdarlamasyn 5 500 qazaqstandyq otbasy paıdalandy.

2022 jyldan beri júzege asyrylyp kele jatqan Kids Go Free baǵdarlamasy aıasynda qazaqstandyq týroperatorlar 1,2 mıllıard teńgege týrlardy satqan.

«Alakól» kóliniń jaǵalaýy atalǵan baǵdarlamanyń eń joǵary suranysqa ıe baǵyt. Ótken jylmen salystyrǵanda bıyl satylǵan týrlardyń sany 20%-ǵa artty. 700-den astam bala Alakólge tegin saıahat jasaý múmkindigine ıe boldy.

Almaty men Almaty oblysynyń mańyndaǵy aımaqtarǵa degen qyzyǵýshylyq ótken jylmen salystyrǵanda 24 paıyzǵa ulǵaıdy. 330 otbasy osy baǵytty tańdaǵan. Balalar áýe bıletteriniń qunyn óteýge jumsalǵan qarjy 41,6 mıllıon teńge bolsa, bul baǵyttaǵy týrlar jalpy 135,3 mıllıon teńgege satyldy.

Shortandy-Býrabaı kýrorttyq aımaǵy men Astana qalasy – «Kids Go Free» baǵdarlamasynyń úshinshi tanymal baǵyty. Oǵan jaz aılary men qysqy demalys kezinde suranys óte joǵary.

– Jyl saıyn ata-analardyń balalarymen birge Qazaqstan boıynsha saıahattaý kórsetkishi artyp keledi. Úsh jyl ishinde qazaqstandyq otbasylar 280 mln teńge únemdedi. Al otandyq týroperatorlar osy ýaqytta 1,2 mlrd teńgege týrlar ótkizdi. Balalardyń áýe tasymalyna sýbsıdııa túrinde memleket tarapynan salynǵan qarjy ata-analardy týǵan jerlerindegi demalysqa yntalandyrady. Memleketten bólingen árbir teńge elimizdiń ekonomıkasyna qosymsha 4 teńge paıda ákeledi dep aıtýǵa bolady, – dep atap ótti Kazakh Tourism basshysy Qaırat Sádýaqasov.

Bıyl osy baǵdarlama boıynsha 2172 balaǵa Qazaqstandy saıahattaý úshin tegin áýe bıletteri usynyldy. Týroperatorlar balalardyń áýe bıletteri qunyn eseptemegende, 415,6 mıllıon teńgege týrlar ótkizdi. Memleket tarapynan 114,5 mıllıon teńge óteldi, bul jalpy satylǵan týrlardyń 28 paıyzy.