Kids Go Free: 3,5 myń bala elimizdi tegin saıahattady

ASTANA. KAZINFORM – Kids go Free balalarǵa arnalǵan saıahattaý baǵdarlamasyn 1600-den astam qazaqstandyq otbasy paıdalandy. Bul týraly QR Týrızm jáne sport mınıstri Ermek Marjyqpaev málim etti.

«Ótken jyldyń qorytyndysy boıynsha memlekettik qoldaýǵa maquldanǵan ótinimderdiń kólemi 2022 jylmen salystyrǵanda 8 ese ulǵaıdy. Osylaısha jalpy somasy 800 mln teńgeden astam somaǵa ótinimder maquldandy. Odan bólek, Kids go free baǵdarlamasyna toqtalǵym keledi. Baǵdarlama iske qosylǵaly onyń múmkindigin 1600-den astam otbasy paıdalandy. Sonyń arqasynda 3,5 myń bala el ishin tegin saıahattaýǵa múmkindik aldy», - dedi Ermek Marjyqpaev vedomstvonyń keńeıtilgen alqa otyrysynda.

Sondaı-aq, mınıstr týrızmmen aınalysatyn kásipkerlerdiń belsendiligin yntalandyrýǵa baǵyttalǵan memlekettik qoldaý sharalaryna toqtalyp ótti. Atap aıtqanda, sheteldik týrısterdi tartqany úshin týroperatorlarǵa sýbsıdııa berý (ár týrıst úshin 15 myń teńge), taý shańǵysy kýrorttary úshin tehnıka men jabdyqtardy satyp alýǵa ótemaqy (25%), týrıstik obektiler salý shyǵynyn óteý (10%), jol boıyndaǵy servıs obektilerin salýǵa ótemaqy (10%), týrıstik avtobýstardy satyp alýǵa ótemaqy (25%), sanıtarlyq-gıgıenalyq toraptar qyzmetin sýbsıdııalaý (83 300 teńge), balalarǵa arnalǵan áýe bıletteri qunyn óteý (Kids go Free).