Kıbersport pen robot tehnıkasyn damytamyz - Ashat Aımaǵambetov
ALMATY.QazAqparat - QR Bilim jáne ǵylym mınıstri Ashat Aımaǵambetov mektep oqýshylaryna qosymsha bilim berý týraly aıtty, dep habarlaıdy QazAqparat tilshisi.
«Bıyl biz qosymsha bilim berýdi damytýdyń tujyrymdamalyq negizin bekittik. Damý jospary bar. Ótken jyly Petropavlda oqýshylar saraıy ashyldy, qazir Qaraǵandy, Kókshetaý jáne basqa da kóptegen qalalarda úlken oqýshylar saraılarynyń qurylysy bastaldy», - dedi Ashat Aımaǵambetov.
Bul oqýshylar saraılarynyń balalarǵa bereri kóp.
«Oqýshylar saraıyndaǵy jas natýralıster, jas tehnıkter, óner jáne mýzyka úıirmeleri oqýshylarǵa arnalǵan. Munda kelýge eshkimdi májbúrlemeıdi, munda reıtıng joq. Desekte, bizdiń barlyq oqýshylar saraılary men qosymsha bilim berý uıymdary balalarǵa lyq toly. Kezekke turǵandar sany da aıtarlyqtaı. Bul taǵy da bizdiń jumysymyzdyń mańyzdylyǵyn kórsetedi. Biraq meni bir nárse mazalaıdy. Statıstıkany qaradym. Elimiz boıynsha 2019 jyldyń birinshi qańtarynda1303 qosymsha bilim berý uıymy bolǵan. Qazir 1262-si qalypty, bul óte alańdatarlyq jáıt. Bilim bóliminiń keıbir basshylary, ókinishke oraı, ońtaılandyrý máselelerin sheship aldy. Orta bilim salasyndaǵy uıymdardy, ásirese qosymsha bilim berý uıymdaryn ońtaılandyrý qajet dep aıtylǵan joq», - dedi Ashat Aımaǵambetov.
Sondaı-aq, ol qosymsha bilim balalarǵa qajetti daǵdylardy ıgerýge yqpal etetinin jetkizdi.
«Biz úshin bul baǵdarlamany ázirleý jáne qoldaý óte mańyzdy. Robototehnıkany damytý qajet. Biz buǵan kóp kúsh jumsaımyz. IT-mektepter ashamyz. Sonymen qatar, basqa baǵyttardy eskerý kerek. Bul týrıstik jáne ólketaný baǵyttary, mýzyka, sýret mektepteri, jas tehnıkter sektsııasy, jas natýralıster jáne basqalar. Jalpy, ár túrli salalardy damytý kerek. Sport bul búgingi kúnniń ajyramas bóligi ekenin túsinýimiz kerek. Biz oıyn alańdary arqyly bilim berýdi damytýymyz kerek. Bul úshin bizde úılestirý keńesi bar jáne biz bul jumysty jandandyramyz», - dedi mınıstr.
Aıta ketý kerek, búgin QR Bilim jáne ǵylym mınıstri «Ǵalamdyq qundylyqtar jáne Qazaqstan bilimi men ǵylymynyń sapasy» atty respýblıkalyq forým aıasynda «Balalarǵa qosymsha bilim berý: memlekettik bilim berý saıasatynyń jańa mindetteri men vektorlary» sektsııasyna qatysty.
