Kıbersport 2022 jylǵy Azııa oıyndarynyń baǵdarlamasyna engiziledi
ASTANA. QazAqparat - Kıbersport Qytaıdyń Hanchjoý qalasynda ótetin 2022 jylǵy jazǵy Azııa oıyndarynyń negizgi baǵdarlamasyna engiziletin bolady, dep habarlady TASS agenttigi.
Azııa olımpıadalyq keńesi kıbersporttyń 2018 jylǵy Azııa oıyndaryna (ındonezııalyq Djakarta men Palembangta ótedi) qosylǵandyǵy týraly habarlady. Atalmysh oıyndarǵa kıbersport kórsetilim retinde qatystyrylady, al 2022 jylǵy dodanyń negizgi baǵdarlamasyna engiziletin bolady.
Azııa oıyndary Halyqaralyq olımpıada komıtetimen (HOK) moıyndalǵan jáne aýqymy jaǵynan Olımpıadadan keıingi ekinshi sporttyq shara bolyp tabylady. 2014 jylǵy Azııa oıyndaryna 45 ulttyq qurama, 10 myńǵa jýyq sportshy qatysty.
Qarasha aıynda Halyqaralyq kıbersport federatsııasynyń prezıdenti Ben Hon Chjon Korean Times-qa bergen suhbatynda onyń alyp otyrǵan laýazymdaǵy maqsaty kıbersportty olımpıadalyq oıyn retinde moıyndatý ekendigin atap ótken bolatyn. Buǵan jaýap retinde HOK baspasóz qyzmeti kıbersportty Olımpıadalyq oıyndar baǵdarlamasyna engizý týraly aıtý ázirge erte ekenin málimdedi.
Keıinnen HOK-tyń sportshylar komıssııasynyń basshysy Andjela Rýdjero kıbersport keleshekte Oıyndar baǵdarlamasyna enýi múmkin ekenin joqqa shyǵarmady.
Hanchjoýda jazǵy Azııa oıyndary 2022 jyly 10-25 qyrkúıek aralyǵynda ótedi.
