Kıbershabýyl Eýropanyń iri áýejaılarynyń jumysyn buzdy

ASTANA. KAZINFORM — Júıe boıynsha tirkeý men otyrǵyzý qyzmetin jetkizýshi kompanııaǵa jasalǵan kıbershabýyl Eýropadaǵy birneshe iri áýejaıdyń jumysyna áser etti, dep habarlaıdy Kazinform agenttiginiń menshikti tilshisi.

Olardyń qatarynda kontınenttegi eń júktemeli áýejaı — Londondaǵy Hıtroý bar. Bul jaǵdaı senbi kúni keıbir reıstiń keshigýine jáne toqtatylýyna alyp keldi

Eýropalyq BAQ málimetinshe, álem boıynsha kóptegen áýejaı men áýekompanııaǵa júıelerin usynatyn Collins Aerospace kompanııasy tehnıkalyq aqaýǵa ushyraǵan. Bul jolaýshylardyń ushý ýaqytynda kidiristerge sebep bolýy múmkin.

Atalǵan oqıǵadan Brıýssel, Berlın jáne London áýejaılary zardap shekti. Birneshe saǵattan keıin Dýblın áýejaıy da bul máseleniń óz jumysyna azdap áser etkenin habarlady. Irlandııadaǵy ekinshi iri áýejaı — Kork áýejaıy da osyndaı jaǵdaıǵa tap bolǵan.

Cirium avıatsııalyq derekter kompanııasynyń málimetinshe, Hıtroý, Berlın jáne Brıýssel áýejaılarynda jalpy 29 reıs (ushý jáne kelý) toqtatylǵan. Senbige Hıtroýdan 651 reıs, Brıýsselden 228, Berlınnen 226 ushý josparlanǵan edi.

Bul oqıǵa — búkil álemdegi úkimetter men kompanııalarǵa baǵyttalǵan kúrdeli kıbershabýyldar men bopsalaýshy baǵdarlamalardyń sońǵy mysaly. Mundaı shabýyldar densaýlyq saqtaý, qorǵanys, bólshek saýda jáne avtokólik óndirisi sııaqty salalardy da qamtyp otyr. Jaqynda Jaguar Land Rover avtokólik kompanııasynda bolǵan aqaý óndiristiń tolyq toqtap qalýyna alyp kelgen bolatyn.

Budan buryn 28 shildede Silent Crow jáne «Kıberpartızany BY» toptary reseılik «Aeroflottyń» korporatıvtik jelisine keń aýqymdy shabýyl jasaǵany belgili boldy. Hakerlerdiń málimetine qaraǵanda, tańerteń Sheremetevo, Melkısarovo keńselerindegi jáne kompanııanyń derekter ortalyqtaryndaǵy 7 myńnan astam server men jumys stantsııalary joıylǵan.