Kıbershabýyl: Alaıaqtar kompanııa júıesine qarapaıym qyzmetker arqyly kirýi múmkin
ASTANA. KAZINFORM — Bir ǵana kıbershabýyl aýrýhanalardyń jumysyn toqtatyp, iri kásiporyndardy shyǵynǵa batyryp, tipti tutas eldiń ınfraqurylymyna áser etýi múmkin. Mundaı shabýyldar kóbine qupııa aqparatty urlaý, júıeniń jumysyn buzý nemese buǵattap, aqsha talap etý maqsatynda jasalady.
Degenmen kıberqylmyskerlerdiń kózdeıtini tek iri kompanııalar ǵana emes. Qarapaıym adamdy aldaý úshin keıde «sálemdemeńiz keldi» degen bir habarlama, jalǵan silteme nemese bir qońyraýdyń ózi jetkilikti.
Onyń ústine jasandy ıntellekt damyǵan saıyn alaıaqtyq tásilderi de kúrdelenip keledi. Kompanııalar mundaı shabýyldan qalaı qorǵanady? Bul týraly Aqparattyq qaýipsizdik aýdıtory Aıda Karbaeva Jibek Joly telearnasynyń «Búgin.LIVE» baǵdarlamasynda jaýap beredi.
Qazaqstanda bızneske kıberqaýipsizdik qyzmetterin usynatyn kompanııalar sany artyp keledi. Olar aqparattyq júıelerdi tekserý, osal tustardy anyqtaý jáne kıbershabýyldardyń aldyn alý baǵytynda qyzmet kórsetedi.
— Kıberqaýipsizdik qyzmetterin paıdalaný bıznes úshin óte mańyzdy. Ásirese shaǵyn kompanııalarda aqparattyq qaýipsizdikke jaýap beretin maman nemese qajetti tehnıkalyq quraldar men baǵdarlamalar bolmaýy múmkin. Mundaı jaǵdaıda olar kıberqaýipsizdik kompanııalarynyń kómegine júginedi, — dedi maman.
Aıda Karbaevanyń aıtýynsha, kompanııalar usynatyn negizgi qyzmetterdiń biri — aýdıt jáne pentest. Bul kezde aqparattyq júıe yqtımal shabýyldaýshynyń kózimen tekserilip, osal tustary anyqtalady. Sonymen qatar SOC ortalyǵy júıede bolyp jatqan oqıǵalardy baqylap, yqtımal qaýipterdi anyqtaýǵa múmkindik beredi.
Kıbershabýyldardyń jıi kezdesetin tásilderiniń biri — qyzmetkerdi aldaý arqyly júıege kirý. Mysaly, alaıaqtar basshynyń atynan esepshige nemese basqa qyzmetkerge shuǵyl habarlama jiberýi múmkin.
— Alaıaqtar adamnyń emotsııasyn paıdalanady. «Shuǵyl» degen habarlamany alǵan qyzmetker siltemege ótip, logıni men qupııasózin engizýi múmkin. Osy arqyly alaıaqtar kompanııanyń ishki júıelerine qol jetkizedi. Qarapaıym qyzmetker arqyly úlken holdıngtiń bazasyna kirip ketýi múmkin. Al ol jerde qyzmetkerlerdiń jeke derekterinen bastap, kompanııanyń ishki qujattaryna deıingi mańyzdy aqparat saqtalady, — dedi ol.
Mamannyń sózinshe, mundaı qaýipten qorǵaný úshin tehnıkalyq júıelerdi jetildirýmen qatar, qyzmetkerlerdiń tsıfrlyq saýatyn arttyrý da mańyzdy.
Kıbershabýyl kompanııaǵa qarjylyq shyǵyn keltirip qana qoımaı, klıentter aldyndaǵy bedeline de keri áser etýi múmkin. Al jeke derekterdiń taralýy keıingi alaıaqtyq áreketterge jol ashýy yqtımal.
— Tipti jeke derekterdi engizbeseńiz de, kúmándi siltemege ótýdiń ózi qaýipti. Sondyqtan kez kelgen habarlamany tekserip, belgisiz siltemelerge ótpeý qajet, — dedi maman.
Aıta keteıik, Qazaqstanda kıberqaýipsizdik mamandaryna arnalǵan granttar artady.
