Kıberpolıtsııa ınternet-alaıaqtyqqa arnalǵan jabdyqtary bar eki sheteldik azamatty ustady

ASTANA. KAZINFORM – Jyl basynan beri alaıaqtardyń 10 uıashyǵynyń qyzmeti toqtatyldy. 11 adam ustaldy, onyń ishinde tórteýi sheteldik. 36 sim-box jabdyǵy, 8 myńnan astam sim-karta, 11 kompıýter, 452 usb-modem tárkilendi. 

ІІM kıberqylmysqa qarsy is-qımyl departamenti uıaly baılanys operatorlarymen jáne «Qazaqtelekommen» birlesip, ınternet-alaıaqtar paıdalanatyn tehnıkalyq arnalardy anyqtaý boıynsha belsendi sharalar qabyldap jatyr. 

Polisia.kz-tiń málimetinshe kıberpolıtsııa qyzmetkerleri Kókshetaý jáne Jezqazǵan qalalarynyń prokýratýrasymen ózara is-qımyl jasaı otyryp, zańsyz qyzmetti júzege asyrý úshin Qazaqstanǵa kelgen eki jumyssyz shetel azamatyn ustady. 

- Eki qalada júrgizilgen tintý is-sharalary barysynda 128 slottan turatyn eki sim-box qurylǵysy, úsh myńǵa jýyq sim-karta, roýterler, marshrýtızatorlar men uıaly telefondar tárkilendi. Ustalǵandardyń ekeýi de ýaqytsha ustaý ızolıatoryna qamaldy, - dedi ІІM kıberqylmysqa qarsy is-qımyl departamenti bastyǵynyń orynbasary Aslan Ýskembaev.

Eske salsaq Astana qalasy polıtsııa departamentiniń uıymdasqan qylmysqa qarsy kúres basqarmasy prokýratýranyń kómegimen iri saýda jelileriniń birine tıesili taýarlyq-materıaldyq qundylyqtardy urlaý shemasyn joıǵan edi.