Kıberpolıtsııa Ekibastuzda zeınetkerdiń 3 mln teńgesin saqtap qaldy
PAVLODAR. KAZINFORM – Polıtsııa men bank qyzmetkerleriniń jedel áreketiniń arqasynda zeınetker alaıaqtarǵa 3 mln teńgesin aýdaryp jiberýden aman qaldy.
Oqıǵa Ekibastuz qalasynda bolǵan. Zeınetker 3 mln teńgeni Grýzııada emdelý aqysy retinde aýdaryp jatqanyna senimdi bolǵan.
Deıturǵanmen «Halyq banki» qyzmetkerleri operatsııadan kúmándi belgilerdi baıqap, aqsha aýdarymyn der kezinde buǵattaǵan. Bank mamandary klıentke onyń alaıaqtardyń qurbany bolýy múmkin ekenin eskertken.
– Oqıǵaǵa Ekibastuz qalasy polıtsııa basqarmasynyń kıberpolıtsııa qyzmetkerleri de qosyldy. Polıtseıler jaǵdaıdyń mán-jaıyn anyqtap, áıelge onyń alaıaqtyq shemaǵa tartylǵanyn túsindirdi. Nátıjesinde bank pen polıtsııa qyzmetkerleriniń birlesken áreketi arqyly aqsha aýdarymy júzege aspady. Osylaısha zeınetker 3 mln teńge kólemindegi jınaǵyn saqtap qaldy, – dep habarlady óńirlik polıtsııa departamentinen.
Alaıaqtardyń arbaýynan qutylǵan zeınetke polıtsııa qyzmetkerleri men «Halyq banki» mamandaryna alǵysyn jetkizdi.
– Olar der kezinde bir nárseniń durys emestigin baıqap, jaǵdaıdy túsinýge kómektesti jáne aqshamdy saqtap qaldy, – deıdi zeınetker.
Polıtsııa azamattardy alaıaqtardyń túrli aıla-tásilderine saq bolýǵa shaqyrady. Qaskóıler kóbine emdelý, týystarynyń qaýipsizdigi nemese aqshany shuǵyl aýdarý qajettiligi sekildi syltaýlardy paıdalanady.
Quqyq qorǵaý organdary beıtanys adamdardyń nusqaýlaryn oryndamaýǵa keńes beredi.
Eske sala keteıik, Astanada júrgizýshi kýáligin jasap berýdi ýáde etken alaıaq 3 jyl 6 aıǵa sottaldy.
