Kıberpolıtseıler birneshe alaıaqtyq shemaǵa qatysy bar dropperdi ustady

KÓKShETAÝ.KAZINFORM – Aqmolada kıberpolıtseıler birneshe alaıaqtyq shemaǵa qatysy bar dropperdi ustady, - dep habarlaıdy Polisia.kz.

Batys Qazaqstan oblysy Oral qalasynda Aqmola kıberpolıtseıleri kem degende úsh alaıaqtyq shemaǵa qatysy bar kúdikti dropperdi ustady. Operatsııa «Anti-Fraud» jedel-aldyn alý is-sharasy aıasynda júrgizildi.

24 jastaǵy kúdikti ınternet-alaıaqtyqqa qatysyp, ony uıymdastyrýshylar men qatysýshylar arasynda deldal qyzmetin atqarǵan. Ol úshinshi tulǵalardy taýyp, olardyń atyna ártúrli bankterde shot ashty. Sol shottardy jábirlenýshilerden urlanǵan aqshany qolma-qol aqshaǵa aınaldyrý úshin paıdalanyp, qarjyny qylmystyq shemalardyń uıymdastyrýshylaryna jetkizgen.

Sonymen qatar kúdiktiniń SIM kartalardy iske qosýmen de aınalysqany anyqtaldy. Bul kartalar alaıaqtarǵa telefon qońyraýlaryn jasaý jáne azamattardy aldaý úshin qoldanylǵan. Mundaı tásil qaskóılerge jeke basyn jasyrýǵa múmkindik berip, olardyń izin tabýdy qıyndatqan.

Qazirgi ýaqytta ustalǵan adamnyń kem degende úsh alaıaqtyq epızodqa qatysy rastalǵan. Sotqa deıingi tergeý sheńberinde polıtsııa onyń basqa da uqsas qylmystarǵa qatysyn tekserip, zańsyz áreketinen zardap shekken azamattardy anyqtaý jumysyn jalǵastyryp jatyr.

Quqyq qorǵaý organdary azamattarǵa qarjylyq operatsııalardy júrgizgende saq bolýǵa, banktik derekterin úshinshi tulǵalarǵa bermeýge, sondaı-aq zańsyz nemese «jeńil tabys» usynystaryna kelisýge bolmaıtynyn eskertti.

Aıta keteıik, Shymkentte kıberpolıtseıler iri ınternet-alaıaqtyq shemasyn anyqtady.

WhatsApp-ta kıberalaıaqtyqtyń jańa túri paıda boldy.