Kıberqylmystar sany 15,1%-ǵa azaıdy - úılestirý keńesi
ASTANA. KAZINFORM - 17 sáýir kúni Qazaqstan Respýblıkasynyń Bas prokýrory Berik Asylovtyń tóraǵalyǵymen Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńestiń otyrysy ótti.
QR Bas prokýratýrasy baspasóz qyzmetiniń habarlaýynsha, onda kıberqylmystarǵa qarsy is-qımyl boıynsha qabyldanyp jatqan sharalardyń tıimdiligi máseleleri qaraldy.
Otyrys barysynda sońǵy úsh aıda kıberqylmystar sanynyń azaıǵany aıtyldy.
Bıyl mundaı quqyq buzýshylyqtar sany 15,1%-ǵa (6 216-dan 5 275-ke deıin) qysqardy.
Oń dınamıka memlekettik organdardyń úılestirilgen jumysynyń jáne Memleket basshysy Qasym-Jomart Toqaevtyń qylmystyq qaýip-qaterlerge reaktıvti áreket etýden proaktıvti áreket etýge kóshý jónindegi tapsyrmalaryn iske asyrýdyń nátıjesi boldy.
Atap aıtqanda, kredıt berý salasyndaǵy qaýipsizdik kúsheıtildi: «salqyndaý kezeńi» engizildi, alǵashqy qaryzdy resimdeý kezinde mindetti jeke qatysý talaby belgilendi jáne ózge de qorǵanys tetikteri iske asyryldy.
Baılanys salasynda da eleýli ózgerister engizildi: SIM-bokstarǵa tyıym salyndy, abonentterdi bıometrııalyq tirkeý engizildi, operatorlarǵa antıfrod-júıelerdi qoldaný jáne alaıaqtyq qońyraýlardy buǵattaý mindetteldi.
Sonymen qatar, dropperlik úshin qylmystyq jaýapkershilik engizildi.
Qazaqstan Respýblıkasy Qylmystyq kodeksiniń 232-1-baby (banktik shotqa, tólem quralyna nemese sáıkestendirý quralyna qoljetimdilikti zańsyz usyný, berý jáne alý, sondaı-aq tólemderdi jáne (nemese) aqsha aýdarymdaryn zańsyz júzege asyrý) kúshine engen sátten bastap 446 is tirkeldi.
Ulttyq bank janyndaǵy Antıfrod-ortalyq arqyly alaıaqtyq operatsııalarmen baılanysty 2,8 mlrd teńge buǵattaldy.
Sondaı-aq tsıfrlyq aktıvter salasyndaǵy qylmystarǵa qarsy kúreske, onyń ishinde krıptovalıýtalardy urlaý shemalaryn áshkereleýge, sondaı-aq vırtýaldy baılanys arnalary arqyly júzege asyrylatyn jappaı alaıaqtyq qońyraýlarǵa qarsy is-qımylǵa erekshe nazar aýdaryldy. > Qazaqstan Bas prokýratýrasy: Bas prokýratýranyń Quqyqtyq statıstıka jáne arnaıy esepke alý komıtetiniń qurylymynda qylmystyq qaýipter men qoǵamdyq qaýipsizdik táýekelderin boljaý ortalyǵy quryldy.
2026 jylǵy 18 sáýirden bastap Komıtetke zańnamalyq turǵyda jańa fýnktsııa – memlekettik organdar úshin usynymdar ázirleýdi qosa alǵanda, boljamdyq-taldamalyq qyzmet júkteledi.
Ortalyqtyń taldaýy kórsetkendeı, alaıaqtyq qońyraýlardyń edáýir bóligi messendjerler (eń aldymen WhatsApp) arqyly júzege asyrylady, bul qylmyskerler belsendiliginiń dástúrli telekommýnıkatsııalyq ınfraqurylymnan tysqary aýysqanyn bildiredi.
Ortalyq 18 jańa kıberqaýipti anyqtady, olardyń ishinde shetelde ornalasqan qylmyskerlerdiń SMS-blasterlerdi (baılanys operatorlaryn aınalyp ótip jappaı habarlama jiberýge arnalǵan qurylǵylar) paıdalanýy; fıshıngtik taralymdar men dıpfeık tehnologııalary; nómirlerdi almastyrý jáne tirkelmegen SIM-kartalardy qoldaný shemalary bar.
2026 jylǵy 4 sáýirde elde alǵash ret SMS-blasterdi paıdalaný faktisi áshkerelendi, bul quqyq qorǵaý organdarynyń kıberqylmystyń jańa túrlerin jedel anyqtap, jolyn kesýge qabiletti ekenin kórsetedi.
Otyrysqa qatysýshylar vedomstvoaralyq ózara is-qımyldyń tıimdiligin, sondaı-aq quqyq qorǵaý organdary qyzmetkerleriniń kıberqaýipsizdik salasyndaǵy biliktiligin arttyrý boıynsha júıeli jumysty atap ótti.
Otyrys sońynda Berik Asylov halyq arasynda kıberqylmyskerlerdiń jańa tásilderi men aılalary týraly túsindirý jumystaryn keńeıtý, sondaı-aq qarjy uıymdarynyń, baılanys operatorlarynyń jáne onlaın-platformalardyń ózderine zańmen júktelgen mindetter sheńberinde klıentteri men paıdalanýshylarynyń quqyqtarymen zańdy múddelerine kıberqaterlerdiń aldyn alý úshin tıisti tsıfrlyq jáne uıymdastyrýshylyq sharalardy qabyldamaýy nemese ýaqtyly qabyldamaýy úshin jaýapkershiligin kúsheıtý qajettigin atap ótti.
Sondaı-aq, Úılestirý keńesi músheleriniń, kıberpolıtsııa bólimsheleriniń jáne Qarjylyq monıtorıng agenttiginiń ınternet-alaıaqtyq pen qarjy pıramıdalaryna qarsy is-qımylǵa qosqan úlesi erekshe atap ótildi.
-«Zań men tártip» qaǵıdatyn iske asyrý sheńberinde halyqtyń quqyqtyq saýattylyǵyn arttyrýǵa jáne kıberqaýipterge qarsy turý daǵdylaryn qalyptastyrýǵa baǵyttalǵan aýqymdy aqparattyq-túsindirý jumystary júrgizilgeni atap ótildi,-delingen habarlamada.
Otyrysqa Prezıdent Ákimshiliginiń ókilderi, Parlament depýtattary, quqyq qorǵaý jáne arnaıy organdardyń basshylary, beıindi mınıstrlikterdiń, sondaı-aq qarjy uıymdarynyń, baılanys operatorlarynyń jáne onlaın-platformalardyń ókilderi qatysty.
Osyǵan deıin Qazaqstanda kıbershabýyldar kezinde ınternet óshirilýi múmkin ekeni týraly jazdyq.
