Kıberqylmys: jyl basynan 90 myńǵa jýyq SIM-karta tárkilendi

ASTANA. KAZINFORM — 2025 jyldyń basynan beri kıberqylmys boıynsha 6 uıymdasqan qylmystyq top anyqtaldy. Bul týraly QR Іshki ister mınıstrligi málim etti.

— Kıberqylmystyń aldyn alý jáne quqyqtyq tártipti nyǵaıtý maqsatynda jyl saıyn «Antıfrod» jedel-profılaktıkalyq is-sharalary ótkizilip keledi. Atap aıtqanda, 2025 jyly bul is-sharalar 18–20 aqpan jáne 13–15 mamyr kúnderi ótti. Onyń barysynda SIM-box qurylǵylaryn zańsyz paıdalaný faktileri anyqtalyp, olardyń qyzmeti toqtatyldy. Máselen, 2025 jyldyń basynan beri 75 SIM-box jáne 89 myńnan astam SIM-karta tárkilendi, 6 uıymdasqan qylmystyq top (onyń ishinde 1 transulttyq top) áshkerelendi, 67 mln frod-qońyraý buǵattaldy, — delingen mınıstrliktiń Kazinform agenttigine bergen jaýabynda.

Sonymen birge, kıberqylmyspen kúres salasyndaǵy halyqaralyq yntymaqtastyq keńeıip keledi. Qazaqstan 109 eldiń kıberqylmyspen kúres bólimshelerimen tikeleı aqparat almasyp otyr. Birlesken yntymaqtastyq baǵytynda halyqaralyq kelisimder bar. Bul halyqaralyq kelisimder Qazaqstanǵa sheteldik qylmyskerlerge qatysty jedel aqparat almasýǵa jáne azamattardyń quqyǵyn qorǵaýǵa múmkindik beredi.

— Halyq arasynda ınternet-alaıaqtyqtyń aldyn alý jáne onyń tásilderi týraly túsindirý jumystary turaqty negizde ótkiziledi. Osy maqsatta el boıynsha 34 588 profılaktıkalyq kezdesý uıymdastyryldy. Bul kezdesýler memlekettik organdarda, bilim berý jáne densaýlyq saqtaý mekemelerinde, bankterde, jeke jáne zańdy tulǵalar arasynda uıymdastyryldy, — dep atalyp ótken vedomstvo aqparatynda.

Aıta keteıik, Astana qalasy Polıtsııa departamentiniń kıberqylmyspen kúres basqarmasy ınternet alaıaqtyqtyń keń taraǵan túrlerin ataǵan edi.