Kıberqaýipsizdikpen aınalysatyn jeke qurylym qajet bolýy múmkin – maman pikiri
ASTANA. KAZINFORM – Elimizge kıberqaýipsizdikpen aınalysýǵa ókilettigi bar jeke qurylym qajet bolýy múmkin. Bul týraly Kıbershabýyldardy taldaý jáne tergeý ortalyǵynyń basshysy Oljas Sátıev aıtty.
«Biz startaptar elimiz ári alǵa shyqqymyz keledi. Bárin jyldam jasaımyz, tez iske qosamyz. Ókinishke qaraı, keıde kıberqaýipsizdik máselesine barynsha baıypty qaramaımyz. Tipti, bankomattan aqsha sheship alýdan bólek kartalardy endi ǵana durys paıdalana bastap edik. Qazir eshkim de qolma- qol aqsha ustamaıtyn boldy. Tehnologııalardaǵy osyndaı jańa qubylystardyń barlyǵy bizge kıberqaýipsizdikti kúsheıtý qajettin túsindirýi tıis. Múmkin kıberqaýipsizdikpen aınalysýǵa ókilettigi bar jeke qurylym qajet shyǵar», - dedi ol Tsıfrlyq damý mınıstrligi uıymdastyrǵan brıfıngte.
Onyń dereginshe, elimizde ІT-bıýdjetiniń 1-den 3 paıyzyna deıin ǵana kıberqaýipsizdikke bólinedi. Al álemdik tájirıbede ol 10 paıyzǵa jetedi.
«Tek azamattar ǵana emes, iri kompanııalardyń basshylary da qazirgi bári de qalypty kórinetin shynaıy jaǵdaıda ómir súrip jatqanymyzdy túsinýi tıis. Bul Djeıms Bond jaıyndaǵy qandaı da bir fılm emes. Kıber-toptar AQSh, Reseı, Qytaı, Koreıa syndy kóptegen elde bar. Tipti, Soltústik Koreıanyń ózinde álemdegi eń myqtylardyń biri sanalatyn hakerlik top bar, olar kıbertyńshylyqpen aınalysady», - dedi Oljas Sátıev.
