Kıberqaýipsizdik tekserýi: uıymdar qandaı talaptardy jıi buzady
ASTANA. KAZINFORM — Qazaqstanda 2024 jyldan beri kıberqaýipsizdik pen derbes derekterdi qorǵaý talaptarynyń saqtalýyna qatysty 648 jospardan tys tekserý júrgizildi.
Onyń ishinde 480 tekserý aqparattyq qaýipsizdikke, 168-i derbes derekterdi qorǵaý salasyna qatysty boldy. Tekserý qorytyndysy boıynsha zań talaptaryn buzǵan uıymdarǵa ákimshilik jaýapkershilik sharalary qoldanyldy. Bul týraly Ortalyq kommýnıkatsııalar qyzmetinde ótken brıfıngte Jasandy ıntellekt jáne tsıfrlyq damý vıtse-mınıstri Dosjan Musalıev málim etti.
Onyń aıtýynsha, tekserýler barysynda uıymdarda uıymdastyrýshylyq jáne tehnıkalyq sıpattaǵy talaptardyń jıi saqtalmaıtyny anyqtalǵan.
— Uıymdastyrýshylyq baǵytta eń jıi kezdesetin kemshilikterdiń qatarynda derbes derekterdi óńdeýge azamattyń kelisimin alý nysanynyń bolmaýy, derekterdi qorǵaý jónindegi ishki saıasattyń ázirlenbeýi jáne aqparattyq qaýipsizdiktiń negizgi quraldarynyń qoldanylmaýy bar. Atap aıtqanda, keıbir uıymdarda antıvırýstyq baǵdarlamalar men jeliaralyq ekrandar ornatylmaǵan, — dedi ol.
Tehnıkalyq talaptardy saqtaý barysynda da birqatar olqylyq anyqtalǵan. Olardyń ishinde kóp faktorly aýtentıfıkatsııanyń engizilmeýi, krıptografııalyq qorǵaý quraldarynyń qoldanylmaýy, qaýipsizdik jańartýlarynyń ýaqytynda ornatylmaýy jáne kıberqaýipsizdik ortalyqtaryna qosylmaý faktileri bar.
— Mundaı kemshilikter aqparattyq júıelerdiń buzylýyna nemese derbes derekterdiń taralýyna ákelýi múmkin. Sondyqtan azamattardyń derbes derekterin jınaıtyn nemese óńdeıtin barlyq uıym kıberqaýipsizdik talaptaryn saqtaýy qajet. Bul talap tek iri uıymdarǵa ǵana emes, shaǵyn jáne orta bıznes sýbektilerine de qatysty. Atap aıtqanda, sulýlyq salondary, bilim berý ortalyqtary, jekemenshik medıtsınalyq uıymdar, kompıýter klýbtary, fıtnes ortalyqtary, dúkender, onlaın platformalar, týrıstik kompanııalar jáne basqa da uıymdar azamattardyń derbes derekterin qorǵaýǵa mindetti, — dedi Dosjan Musalıev.
Vıtse-mınıstrdiń aıtýynsha, tsıfrlandyrýdyń qarqyndy damýyna baılanysty azamattardyń derbes derekteri kóptegen uıymda saqtalyp, óńdeledi. Sondyqtan árbir uıym olardyń qorǵalýyn qamtamasyz etýge mindetti.
Eske salaıyq, buǵan deıin Úkimet kıberqaýipsizdikti qamtamasyz etý qaǵıdalaryn jańartyp, tsıfrlyq ınfraqurylymdy qorǵaý talaptaryn kúsheıtken bolatyn.
