Kıberqaýip, zańsyz shyǵarylǵan aktıvterdi qaıtarý: Bas prokýratýra kelisim jasady
ASTANA. KAZINFORM – Qazaqstan Bas Prokýrory Berik Asylov Ulybrıtanııa jáne Soltústik Irlandııa Birikken Koroldiginiń Qazaqstandaǵy Tótenshe jáne Ókiletti Elshisi Sallı Aksýorsımen kezdesý ótkizdi.
Ulybrıtanııanyń ókiline qazaqstandyq prokýratýranyń negizgi fýnktsııalary men basym baǵyttary týraly aqparat berildi.
Kezdesý barysynda zań ústemdigi men adam quqyqtaryn qorǵaý salasyndaǵy ekijaqty yntymaqtastyqty odan ári nyǵaıtýǵa, sondaı-aq naqty qylmystyq ister boıynsha izdeýde júrgen adamdardy ekstradıtsııalaýǵa qatysty keń aýqymdy máseleler talqylandy.
Bas Prokýror qylmystyq sot isin júrgizý salasynda kelisimder jasasý arqyly sharttyq-quqyqtyq bazany odan ári keńeıtý qajettiligine erekshe atap ótti.
Áńgimelesýshi ózara qyzyǵýshylyq týdyratyn barlyq quqyqtyq másele boıynsha yntymaqtastyqqa daıyn ekenin rastady. Kezdesý nátıjesinde taraptar transulttyq qylmysqa, kıberqaýipterge, qylmystyq kiristerdi jylystatýǵa qarsy is-qımyl, sonymen birge zańsyz shyǵarylǵan aktıvterdi qaıtarý salalarynda ózara yntymaqtastyqty jalǵastyrý týraly ýaǵdalasty.
Aıta keteıik, bas prokýror Qazaqstanda qylmystyq isterdiń 90 paıyzy elektrondyq formatta tergelip jatqanyn aıtqan edi.