Kıberqaýipsizdik jónindegi bólimshe erekshe mártebege ıe bolýy tıis - Darıǵa Nazarbaeva
PETROPAVL. QazAqparat - Petropavl qalasyndaǵy QR Ulttyq gvardııasynyń Áskerı ınstıtýtynda Parlament Senatynyń Halyqaralyq qatynastar, qorǵanys jáne qaýipsizdik komıteti músheleriniń otyrysy ótti, dep habarlaıdy QazAqparat tilshisi.
Kezdesýdiń taqyryby áskerı bilimdi jetildirý máselesine arnaldy. Otyrysty ashqan komıtet tóraǵasy Darıǵa Nazarbaeva QR Áskerı doktrınasynda memlekettiń áskerı qaýipsizdigin qamtamasyz etý sekildi negizgi sharalardan bólek, áskerı bilimge mańyz berý de qarastyrylǵanyn atap ótti.
«Bul sharalar orta merzimdi kezeńde áskerı kadrlardy daıarlaý boıynsha júrgiziletin jumystyń baǵdary bolyp tabylady. Geosaıası jaǵdaılar, armııaǵa degen talaptar ózgeriske ushyrap, sáıkesinshe áskerı kadrlardy da daıarlaý júıesi ózgerý ústinde. Memleket basshysy bul sharýaǵa erekshe mańyz beredi», - dedi senator.
Otyrys barysynda áskerı oqý oryndary tap keletin máseleler týraly aıtyldy. Darıǵa Nazarbaeva ásirese kıberqaýipsizdik salasyndaǵy mamandardy daıarlaý týraly sóz qozǵady.
«Kıberqaýipsizdikpen aınalysatyn qorǵanys júıesi bólimshesiniń jaqsy aılyq aqysy men arnaıy mártebesi bolýy kerek. Áıtpese, onda úzdik mamandardy tartý múmkin emes. Bul mańyzdy suraq. Osyǵan erekshe nazar aýdaryńyz», - dedi Darıǵa Nazarbaeva.
Ol óz sózinde áskerı saladaǵy kadrlyq daıarlaý júıesine basqasha amalmen qaraıtyn ýaqyt kelgenin tilge tıek etti.
«Kadrlardy daıarlaý máselesi - kez kelgen memlekettegi negizgi jumys bolyp tabylady. Bálkim, bilim júıesi men kadrlardy daıarlaý júıesine tolyǵymen kóńili tolatyn birde-bir qoǵam joq shyǵar. Eger jalpy azamattyq joǵary oqý oryndarynda (JOO) jaǵdaı retke kelip, ondaǵylar ózderi jaqsy sezine bastasa, vedomstvolyq - qaýipsizdik, azamattyq qorǵanys jáne tótenshe jaǵdaılar salasyndaǵy áskerıler - materıaldyq-tehnıkalyq qamtamasyz etý turǵysynan damýdan qalyp barady. Bul JOO-larda eńbek etetin muǵalimder, basshylar jumysynyń kúrdeliligine qaramastan, úzdik mamandardy daıarlaý úshin barynsha kúsh salyp jatyr dep esepteımin», - dedi senator.
Ol sonymen qatar, «jabyq» JOO-larǵa degen baǵytty jumystardy qaıta qaraýǵa bolatynyn atap ótti.
«Bıýdjetke qol jaıa bermeı, qazir ashylyp, kommertsııalyq bólimshelerdiń jumysyn bastap, ózindik máseleni sheshý úshin aqsha tabýǵa kirisip ketýge bolady. Biz osy mindetti aldymyzǵa qoıyp, Úkimetpen birge osy suraqtar boıynsha sheshim izdeıtin bolamyz», - dedi Darıǵa Nazarbaeva.
QR UQK Shekaralyq Akademııasynyń bastyǵy Pavel Polıvanov otyrys kezinde daıarlyq jumystary úsh deńgeıde, atap aıtqanda bakalavrıat, magıstratýra jáne doktorantýra boıynsha daıyndalyp jatqanyn aıtty. Alaıda akademııanyń asqaq jetistikterimen birge sheshilmegen máseleleri de joq emes.
«JOO-lardyń qarym-qatynasyn tolyqqandy emes, áskerı pedagogtardy ázirleý máselesi de sheshimin tapqan joq. Normatıvtik-quqyqtyq bazada jabyq taqyryptar boıynsha ǵylymı zertteýlerdi júzege asyrýdyń erekshe tártipteri belgilenbegen. Ulttyq qaýipsizdik organdarynyń arnaıy oryndaryndaǵy qyzmetkerleri men áskerı qyzmetkerlerine ǵylymı dáreje boıynsha qosymsha aqy berý toqtatylyp qalǵan», - deıdi Polıvanov.
Otyrysta sonymen qatar QR Qorǵanys mınıstrliginiń áskerı bilim jáne kadr departamentiniń bastyǵy Qaırat Kópbaev baıandama jasady.
Saladaǵy ózge de máseleler týraly QR ІІM TJK Kókshetaý tehnıkalyq ınstıtýtynyń bastyǵy Syrym Sháriphanov ta aıtyp berdi.
