Kıberalaıaqtyqty ashý kórsetkishi 29%-ǵa ósti - Bas prokýratýra
ASTANA. KAZINFORM – Kıberalaıaqtyqtardy ashý kórsetkishi 29%-ǵa ósti (36,5%-dan 66%-ǵa deıin), keltirilgen zalaldy óteý deńgeıi 57%-dy qurady (3,4 mlrd teńgeniń 1,9 mlrd teńgesi óteldi). Bul málimetter Bas prokýratýrada ınternet-alaıaqtyqtarǵa qarsy is-qımyl máseleleri boıynsha ótken vedomstvoaralyq keńeste aıtyldy.
Aıta keteıik, jıynǵa Іshki ister mınıstrliginiń Tergeý departamenti men Kıberqylmysqa qarsy is-qımyl departamentiniń basshylary qatysty.
Jumys qorytyndylary shyǵarylyp, jedel-tergeý qyzmetiniń tıimdiligin arttyrý sharalary talqylandy.
Bıylǵy 2 aıda ınternet-alaıaqtyqtar sany 8,3%-ǵa tómendegeni baıqalady (4 385-ten 4 023-ke deıin).
Qylmystyq jaýapqa 913 quqyq buzýshy tartyldy.
Dropperlik shemalardy anyqtaý boıynsha belsendi jumys júrip jatyr.
Dropperlik úshin jaýapkershilik engizilgen sátten bastap Qylmystyq kodekstiń 232-1-baby (Banktik shotqa, tólem quralyna nemese sáıkestendirý quralyna qoljetimdilikti zańsyz usyný, berý jáne alý, sondaı-aq tólemderdi jáne (nemese) aqsha aýdarymdaryn zańsyz júzege asyrý) boıynsha 400-den astam is tirkelip, onyń 66-sy sotqa joldandy.
Sonymen qatar, alaıaqtar paıdalanatyn SIM-kartalar men WhatsApp akkaýnttaryn belsendendirýshilerdiń qyzmeti toqtatylyp jatyr.
Máselen, bıylǵy aqpan aıynda Batys Qazaqstan oblysynda alaıaqtarǵa kómektesken adam 6 jylǵa bas bostandyǵynan aıyryldy. Ol óz atyna myńnan astam SIM-kartany rásimdep, olardy qylmystyq maqsatta paıdalaný úshin alaıaqtarǵa bergen.
Sondaı-aq «sur provaıderlerge» erekshe nazar aýdarylyp otyr, olar alaıaqtardy vırtýaldy baılanyspen qamtamasyz etedi.
Mysaly, osy jyldyń qańtar aıynda Qostanaı oblysynda jalǵan baılanys operatorynyń tehnıgi sheteldik alaıaqtyq koll-ortalyqtarǵa IP-telefonııa qyzmetin kórsetkeni úshin 7 jylǵa bas bostandyǵynan aıyryldy.
-Jalpy, búgingi tańda jumystyń negizgi qaǵıdaty – tek oryndaýshylar men uıymdastyrýshylarǵa ǵana emes, sonymen qatar kıberorta men qylmys jasaýǵa jaǵdaı jasaıtyn faktorlarǵa da yqpal etý bolyp tabylady,-delingen habarlamada.
Osyǵan deıin Qazaqstanda kıberqylmyspen kúres qalaı júrip jatqany týraly jazdyq.