Kıberalaıaqtyqtan zardap shekkenderge 4,8 mlrd teńge qaıtaryldy
ASTANA. KAZINFORM — Internet-alaıaqtar azamattardy aldaýdyń jańa tásilderin oılap tabýda. Alaıda polıtsııa kıberqylmysqa qarsy kúresti kúsheıtip keledi. Jyl basynan beri ІІM ınternet-alaıaqtyq faktileriniń sanyn 7%-ǵa tómendetti. Bul týraly Polisia.kz jazdy.
— Búgingi tańda kıberalaıaqtyq eń kóp taraǵan qylmys túrine jatady. Qylmyskerler ózderiniń táselderin únemi ózgertip otyrady, zamanaýı tehnologııalardy, psıhologııalyq qysymdy qoldanady jáne azamattardyń aqshasyn ıemdenýge tyrysady. Sondyqtan bizdiń basty mindetimiz — qylmyskerlerdi anyqtap, jaýapkershilikke tartýmen ǵana shektelmeı, azamattardy alaıaqtyq áreketterden qorǵaýdy qamtamasyz etý. Jyl basynan beri ınternet-alaıaqtyqtyń sany 7%-ǵa azaıdy. Olardy ashý kórsetkishi jaqsardy, jábirlenýshilerge 4,8 mıllıard teńge qaıtaryldy. Ulttyq bankpen birlesip, taǵy 2,6 mıllıard teńgeni zańsyz alýǵa jol berilmedi. Sonymen qatar profılaktıkaǵa kóp kóńil bólinýde. Jetekshi platformalarmen birge biz azamattarǵa eń kóp taralǵan aldaý shemalary týraly aıtamyz, táýekelder týraly eskertemiz jáne halyqtyń tsıfrlyq saýattylyǵyn arttyramyz. Operatorlarmen birlesip, 150 mıllıonnan astam alaıaqtyq qońyraý buǵattaldy. Uıymdasqan qylmystyq toptardy anyqtaý jáne joıý boıynsha belsendi jumys júrgizilýde. Sheteldik áriptestermen birge birneshe halyqaralyq alaıaqtyq call-ortalyqtardyń qyzmeti toqtatyldy, qazaqstandyqtardyń aqshasyn urlaǵan ondaǵan qatysýshylar ustaldy. Azamattardyń derbes derekterin zańsyz taratqan qylmystyq ınternet-resýrstyń qyzmeti áshkerelenip, kináliler ustaldy. Sondaı-aq biz iri ınternet-platformalardyń ákimshilikterimen tyǵyz qarym-qatynas jasaımyz. Bul óz kezeginde jalǵan habarlamalar taratatyn, alaıaqtyq jáne azamattardyń qaýipsizdigine qaýip tóndiretin, basqa da qylmystar jasaıtyn qaskúnemderdi jedel anyqtaýǵa múmkindik beredi. Alaıda eshqandaı tehnologııa jeke qyraǵylyqty almastyra almaıtynyn eskertkimiz keledi. Eshqashan bógde adamdarǵa SMS kodtaryn, bank kartalarynyń derekterin bermeńiz jáne belgisiz tulǵalardyń ótinishi boıynsha baǵdarlamalardy ornatpańyz, olar banktiń, baılanys operatorlarynyń, quqyq qorǵaý jáne memlekettik organdardyń qyzmetkerleri bolyp habarlasýy múmkin. Eger sizde kishkene kúmán týyndasa, áńgimeni úzip, uıymnyń resmı nómirine ózińiz qońyraý shalyńyz jáne polıtsııaǵa kúdikti qońyraý týraly habarlańyz. Azamattardyń quqyqtaryn qorǵaý bizdiń sózsiz basymdyǵymyz bolyp qala beredi. Kıberqylmysqa qarsy is-qımyl boıynsha jumys jalǵasatyn bolady, — dedi ІІM kıberqylmysqa qarsy is-qımyl departamenti bastyǵynyń orynbasary Álibek Orazaly.
Aıta keteıik, elordada kıberalaıaqtyqqa qatysy bar 48 adam ustaldy.
