Kıber alaıaqtardyń 10 qylmystyq toby áshkerelendi - Bas prokýratýra

ASTANA. QazAqparat – QR Bas prokýratýrasy alaıaqtyq pen qarjy pıramıdalaryna qarys kúres baǵytynda qolǵa alynǵan is-sharalardyń oryndalý barysy týraly málimetterdi jarııalady, dep habarlaıdy QazAqparat.

2021 jylǵy 1 qyrkúıekte Memleket basshysy Qazaqstan halqyna Joldaýynda Bas prokýratýraǵa alaıaqtyq pen qarjy pıramıdalaryna qarsy is-qımyl jóninde sharalar keshenin qabyldaýdy tapsyrdy.

Máseleniń ózektiligi atalǵan qylmys túrlerin tirkeýdiń turaqty ósýine jáne jábirlenýshilerdiń kóptigine baılanysty boldy.

Osyǵan baılanysty, Bas prokýratýra múddeli organdarmen birlesip 2022 jylǵa arnalǵan alaıaqtyqtarǵa (ınternet-alaıaqtyqtarǵa) jáne qarjy pıramıdalaryna qarsy is-qımyl jónindegi birlesken is-sharalar keshenin qabyldady.

Іs-sharalar keshenine quqyq qorǵaý jáne ýákiletti organdardyń ózara is-qımylyn kúsheıtý, qyzmetkerlerdiń biliktiligin arttyrý, tsıfrlyq tehnologııalardy engizý, qoldanystaǵy normatıvtik qujattardy jetildirý (jedel aqparat almasý, jedel-tergeý qyzmetkerleri úshin beıindi oqytý júrgizý, IT baǵdarlamalar men qosymshalardy ázirleý jáne engizý, jaýapkershilikti kúsheıtý jáne t.b.) jónindegi sharalar kiredi.

Atap aıtqanda, Bas prokýratýra suranystardy sanktsııalaý rásimin saqtaı otyryp, banktik shottar men aqsha qarajattarynyń qaldyǵyna suranystardy jiberý bóliginde Quqyq qorǵaý, arnaýly memlekettik jáne ózge de organdardyń aqparat almasý júıesi ámbebap servısi jobasyn iske asyrdy.

Bul aqparat almasýdy jedeldetýge jáne kıber alaıaqtardyń 10 qylmystyq tobyn izin sýytpaı áshkereleýge múmkindik berdi.

Mysaly, Shymkentte bes adamnan turatyn quqyq buzýshylar toby ózderin bank qyzmetkerleri retinde tanystyra otyryp, azamattarǵa nesıe resimdep, qashyqtan qol jetkizý baǵdarlamalaryn paıdalana otyryp, aqsha qarajatyn jymqyrǵan.