QHR Tóraǵasynyń sapary ózara saıası senimniń jańa irgetasyn qalaıdy – Qazaqstandaǵy QHR Elshisi
Qazaqstan Prezıdenti Qasym-Jomart Toqaevtyń shaqyrýymen Qytaı Halyq Respýblıkasynyń Tóraǵasy Sı Tszınpın 14 qyrkúıekte Qazaqstanǵa memlekettik saparmen keledi. Elshi atap ótkendeı, aldaǵy sapar Qytaı men Qazaqstan arasyndaǵy dıplomatııalyq qatynastardyń ornaǵanyna 30 jyl tolýymen tuspa-tus kelip otyr.
«Bul Tóraǵa Sı Tszınpınniń COVID-19 bastalǵaly alǵashqy sheteldik sapary. Sapar Qytaı men Qazaqstan qatynastarynyń 30-shy mereıtoıyn atap ótedi. 1992 jyly Qytaı men Qazaqstan dıplomatııalyq qatynastar ornatý týraly kommıýnıkege qol qoıdy. Sońǵy 30 jylda Qytaı-Qazaqstan baılanystary eki eldiń halyqtaryna paıda ákelip qana qoımaı, óńirdegi beıbitshilik pen turaqtylyqqa mańyzdy úles qosyp, kórshi elder arasyndaǵy tatý kórshilik dostyqtyń úlgisi boldy, zamanaýı qarqyndy damýǵa qol jetkizdi», - dedi Chjan Sıao.
Elshi qazirgi álemniń qarqyndy ózgeristerdiń jańa kezeńine aıaq basqanyn atap ótti. Onyń aıtýynsha, sapar barysynda eki eldiń kóshbasshylary Qytaı men Qazaqstan qatynastarynyń damý perspektıvalaryn talqylaıdy, is-qımyl josparyn birlesip ázirleıdi jáne ekijaqty qatynastardyń turaqty jáne uzaqmerzimdi ilgerileýine jáne olardyń jańa deńgeıge kóshýine yqpal etpek.
«Bul sapar Qytaı men Qazaqstannyń saıası ózara seniminiń jańa irgetasyn qalaıdy. 30 jyl buryn dıplomatııalyq qarym-qatynas ornaǵan sátten bastap, eki el bir-birin senimdi dostar jáne baýyrlar sııaqty jaqyn kórshiler retinde qarastyryp, qos taraptyń negizgi múddelerin qozǵaıtyn máselelerde qoldaý kórsetti», - dep atap ótti Qytaı elshisi.
Qazirgi ýaqytta Qytaı «Bir beldeý, bir jol» bastamasy boıynsha 149 elmen jáne 32 halyqaralyq uıymmen yntymaqtastyq týraly 200-den astam qujatqa qol qoıdy. Bıylǵy mamyr aıyndaǵy jaǵdaı boıynsha bul baǵyttar boıyndaǵy eldermen taýar saýdasynyń jalpy kólemi shamamen 11,8 trln AQSh dollaryna jetti. Tikeleı ınvestıtsııalar 140 mlrd AQSh dollarynan asady.
«Bul sapar Qytaı men Qazaqstannyń iskerlik yntymaqtastyǵyn jańa beleske shyǵarady. Qytaı men Qazaqstan ekonomıkalyq turǵyda bir-birin tolyqtyrady jáne yntymaqtastyq úshin zor áleýeti bar. 1992 jyldan 2021 jylǵa deıin Qytaı-Qazaqstan saýdasy 368 mln AQSh dollarynan 25,25 mlrd AQSh dollaryna deıin 70 esege jýyq ósti», - dedi elshi.
Buǵan deıin Aqorda Prezıdent Qasym-Jomart Toqaevtyń shaqyrýymen 14 qyrkúıek kúni elimizge Qytaı Halyq Respýblıkasynyń Tóraǵasy Sı Tszınpın memlekettik saparmen keletinin habarlaǵan edi.
Resmı aqparatqa sáıkes, Qazaqstan men Qytaı basshylary qazaq-qytaı strategııalyq seriktestigin jan-jaqty nyǵaıtýdyń perspektıvalaryn talqylaıdy. Kelissózderden keıin birqatar ekijaqty qujatqa qol qoıý josparlanyp otyr.
