QHR Tóraǵasynyń orynbasary saılandy
BEIJІŃ. QazAqparat - Búgin 13-shi shaqyrylymdaǵy Búkilqytaıyq halyq ókilderi jınalysynyń tarıhı 1-sessııasynyń delegattary Van Tsıshandy QHR Tóraǵasynyń orynbasary etip saılady, dep habarlaıdy «QazAqparat» HAA-nyń Qytaıdaǵy menshikti tilshisi.
Sessııanyń besinshi jalpy otyrysyndaǵy daýys berýge 2970 delegat qatysyp, sonyń 2969-y Van Tsıshannyń kandıdatýrasyn qoldaǵan, bir halyq qalaýlysy qarsy bolǵan.
Eske sala keteıik, Qytaı Kompartııasynyń 19-sezine deıin Van Tsıshan QKP ádepti qadaǵalaý jónindegi Ortalyq komıssııasyn basqarǵan bolatyn, ony el arasynda «Sı Tszınpınniń jazalaýshy semseri» dep ataıtyn.
QHR Memlekettik keńesiniń vıtse-premeri bolǵan kezinde Van Tsıshan Qazaqstan-Qytaı yntymaqtastyq komıtetiniń teńtóraǵasy qyzmetin de atqarǵan.
Búgin delegattar Sı Tszınpındi QHR Tóraǵasy jáne QHR Ortalyq áskerı keńesiniń tóraǵasy laýazymdaryna biraýyzdan qaıta saılady. Nursultan Nazarbaev Sı Tszınpınge Qytaı Halyq Respýblıkasynyń Tóraǵasy qyzmetine qaıta saılanýyna baılanysty quttyqtaý jedelhatyn joldady.
Foto: REUTERS/Jason Lee
