QHR Tóraǵasy Sı Tszınpın: Nursultan Nazarbaevtyń basshylyǵymen Qazaqstan zor jetistikterge qol jetkizdi

ASTANA. QazAqparat - Elbasy tapsyrmasymen Premer-Mınıstr Baqytjan Saǵyntaev resmı saparmen Qytaı Halyq Respýblıkasyna bardy. Pekınde Qazaqstan Premer-Mınıstrin QHR Tóraǵasy Sı Tszınpın qabyldady. Bul týraly primeminister.kz habarlaıdy.

QHR Tóraǵasy Sı Tszınpınmen resmı kezdesý barysynda Baqytjan Saǵyntaev QR Prezıdenti Nursultan Nazarbaevtyń jyly lebizin jáne Memleket basshysynyń 2019  jyly resmı saparmen Qazaqstanǵa shaqyrýyn jetkizdi. Qazirgi tańda QHR - QR-nyń iri syrtqy saýda seriktesi, elderdiń ekijaqty saýda-ekonomıkalyq yntymaqtastyǵynyń kóptegen salalarynda keleshegi zor.

Óz kezeginde Qytaı Tóraǵasy QR Prezıdentine sálemin joldap, memleketaralyq qarym-qatynastardyń joǵary deńgeıin atap ótti, ári Prezıdent N. Nazarbaevtyń basshylyǵymen Qazaqstan zor jetistikterge qol jetkizgenin, Qytaı Qazaqstan halqynyń óziniń egemen jolymen júrýge degen talpynysyn qoldaıtynyn jetkizdi. Sı Tszınpın «Beldeý jáne jol» bastamasynyń besjyldyǵyna da nazar aýdardy. QHR Tóraǵasy baǵdarlamanyń ıdeıasy 2013 jylǵy 7 qyrkúıekte Astanadaǵy Nazarbaev ýnıversıteti alańynda aıtylǵanyn eske salyp, ony Nursultan Nazarbaevpen birlesip usynylǵan bastama dep sanaıtynyn jetkizdi.