QHR tóraǵasy Palestına máselesi boıynsha halyqaralyq konferentsııa shaqyrýǵa úndedi

Qytaı tóraǵasy Sı Tszınpın álem qaýymdastyǵyn Palestına máselesin sheshý úshin halyqaralyq beıbitshilik konferentsııasyn shaqyrýǵa shaqyrdy. Bul týraly ol Taıaý Shyǵys boıynsha BRIKS-tiń kezekten tys onlaın sammıtinde aıtty, dep habarlaıdy Kazinform menshikti tilshisi QHR Syrtqy ister mınıstrligine silteme jasap.

«Palestına máselesi ádil sheshilmeıinshe, Taıaý Shyǵysta turaqty beıbitshilik pen qaýipsizdik bolýy múmkin emes», – dep keltirdi QHR SІM Sı Tszınpınniń sózin.

Sondaı-aq S.Tszınpın Palestına men Izraıl arasynda keıingi shıelenis bastalǵannan beri Qytaı beıbit kelissózder men atysty toqtatýǵa belsendi túrde yqpal etip kele jatqanyn aıtty. BUU Qaýipsizdik Keńesiniń osy aıdaǵy tóraǵasy retinde Qytaı gýmanıtarlyq kómek pen dálizder úshin jasalatyn úzilisterdi uzartýdy, beıbit turǵyndardy qorǵaýdy jáne gýmanıtarlyq kómek kórsetýdi kózdeıtin qarardyń qabyldanýyna yqpal etti.

21 qarashada BRIKS elderi basshylarynyń Taıaý Shyǵystaǵy jaǵdaıǵa arnalǵan kezekten tys onlaın sammıti ótti. Sharaǵa Argentına, Mysyr, Iran, Birikken Arab Ámirlikteri, Saýd Arabııasy jáne Efıopııa elderiniń ókilder de keldi. Sondaı-aq BUU Bas hatshysy Antonıý Gýterrısh qatysty.

Sammıt qorytyndysy boıynsha BRIKS elderiniń basshylary Taıaý Shyǵystaǵy, atap aıtqanda, Gaza sektoryndaǵy jaǵdaı týraly birlesken málimdeme qabyldady.

Búgin habarlaǵanymyzdaı, Izraıl men HAMAS ózara tutqyndardy bosatýǵa jáne soǵysty 4 kúnge toqtatýǵa kelisti.