QHR tóraǵasy: Qytaı Qazaqstannyń ishki isterine kılikkenderge qarsy turady

ASTANA. KAZINFORM – Qytaı Halyq Respýblıkasynyń Tóraǵasy Sı Tszınpın aldaǵy memlekettik sapar aldynda Qazaqstannyń buqaralyq aqparat quraldaryna arnap jazǵan avtorlyq maqalasynda resmı Beıjińniń Astanaǵa qatysty saıasatynyń negizgi ustyndaryn atady.

«Qytaı danalyǵy dosqa aıtqan ár sózdiń údesinen shyǵý kerektigin ósıet etedi. Qazaqstandyq dostarymyzben ári qaraı da shynaıylyq pen senimge negizdelgen qarym-qatynasty ornata beremiz. Strategııalyq turǵyda úılesken ózara saıası senimdi tereńdetip, bir-birimizdiń túpkilikti múddemiz ben negizgi alańdatatyn máselelerde ózara qoldaýdy arttyra beremiz. Qytaı tarapy Qazaqstannyń ulttyq qaýipsizdigin, egemendigi men aýmaqtyq tutastyǵyn qorǵaýǵa, óz betimen tańdap alǵan damý jolyn ustanýǵa, memlekettiń gúldenýine qajetti ishki jáne syrtqy saıasatyn iske asyrýǵa baǵyttalǵan kúsh jigerin qoldaýdan aınymaıdy, Qazaqstannyń ishki isterine kılikse, kimge bolsa da qarsy turady. Ózara syılastyq, tatý kórshilik, ózara kómek jáne ózara tıimdilik sııaqty tórt mańyzdy qaǵıdatty damytyp, arttyrý ekijaqty qarym-qatynastyń ornyqty dınamıkasyn saqtaýǵa negizdelgen», - dep jazady Qytaı basshysy.

Onyń paıymynsha, Qytaı men Qazaqstan ekonomıkasy qurylymy jaǵynan bir-birin tolyqtyryp tur.

«Bir beldeý jáne bir jol» bastamasy men Ádiletti Qazaqstan ekonomıkalyq baǵdaryn ushtastyryp iske asyrýǵa birlesip kúsh salamyz. Qazaqstandyq taýarlardyń alpaýyt qytaı naryǵyna jolyn keńeıtip, Qytaı damýynyń múmkindikterin birlesip paıdalanamyz», - dedi Sı Tszınpın.

Sı Tszınpın maqalasynda osy memlekettik saparynyń mánin túsindiredi. Sondaı-aq onda qytaılyqtardyń dastarhanynda qazaqstandyq ónim kóbeıe túskeni aıtylǵan. QHR tóraǵasy avtorlyq maqalasynda Qytaı men Qazaqstannyń mádenı baılanysyna eńbek etip júrgen qazaqtardy atap, eki el arasyndaǵy vızasyz rejımniń artyqshylyǵyna toqtalady.

Buǵan deıin habarlanǵanyndaı, 2-4 shilde kúnderi Prezıdent Qasym-Jomart Toqaevtyń shaqyrýymen Qytaı Halyq Respýblıkasynyń Tóraǵasy Sı Tszınpın Qazaqstanǵa memlekettik saparmen keledi. Ol sondaı-aq, Shanhaı yntymaqtastyq uıymyna múshe memleketter basshylary keńesiniń 24-shi otyrysyna qatysady.

Bir-birine basty saýda-ekonomıkalyq serikteske aınalǵan qos memlekettiń basshylarynyń kezdesýinde qandaı mán bar? Kazinform tilshisi taldap kórdi.