QHR SІM basshysy «Bir beldeý, bir jol» bastamasynyń altyn erejesin aıtyp berdi
ASTANA. QazAqparat - Qytaı tarapy usynǵan «Bir beldeý, bir jol» bastamasy aıasyndaǵy yntymaqtastyq aıqyn, ashyq ári jalpyǵa qoljetimdi. Bul týraly QHR Syrtqy ister mınıstri Van I aıtty, dep habarlaıdy QazAqparattyń Qytaıdaǵy menshikti tilshisi Sadyq Ákejanov.
«Bir beldeý, bir jol» bastamasyn odan ary damytýdy qoldaý úshin birlesken konsýltatsııalar, birlesken qurylys pen birigip paıdalaný «altyn ereje» sanalady. Bul erejeler bastama aıasyndaǵy yntymaqtastyqtyń teńquqyly, ashyq jáne jalpyǵa qoljetimdi sıpatyn aıqyndap berdi. Bul jobalaýdan bastap jobalardy júzege asyrýǵa deıingi yntymaqtastyqtyń barlyq protsesinde bastamaǵa qatysýshylar birlesken konsýltatsııalar negizinde jumys isteıdi degendi bildiredi. Barlyq qatysýshylardyń quqyǵy birdeı, kóleńkeli operatsııalarǵa oryn joq, barlyǵy da ashyq ári aıqyn júredi, ózgege zııan keltire otyryp, bir taraptyń utysqa shyǵýyna jol berilmeıdi. Barlyǵy da ózara tıimdilik pen jalpyǵa ortaq paıda qaǵıdatyn basshylyqqa alady», - dedi ol baspasóz konferentsııasy barysynda «QazAqparat» halyqaralyq aqparat agenttigi tilshisiniń aldaǵy jylda «Bir beldeý, bir jol» strategııasynyń keleshegine qatysty saýalyna jaýap bere kele.
Sonymen qatar, ol «Bir beldeý, bir jol» bastamasyn júzege asyrý barysynda halyqaralyq erejeler men naryqtyq ustanymdar saqtalatyndyǵyn basa aıtty.
«Ótken jyly «Bir beldeý, bir jol» aıasyndaǵy halyqaralyq yntymaqtastyq boıynsha Joǵary deńgeıdegi forýmda jarııalanǵan birlesken kommıýnıkede jarııa ýaǵdalastyq boldy. Onda yntymaqtastyqtyń turaqty damýyn qamtamasyz etý úshin ekonomıka, qoǵam, qarjy jáne qorshaǵan orta arasyndaǵy qarym-qatynasty retteýge aıryqsha nazar aýdarylǵan», - dedi QHR Syrtqy ister mınıstri.
