QHR sherýshilerdiń AQSh elshisiniń kóligine shabýyl jasaý oqıǵasyn tekserýde
BEIJІŃ. 20 qyrkúıek. QazAqparat - Beıjińde 18 qyrkúıek kúni Qytaıdaǵy Japonııa elshiliginiń janynda narazylyq aktsııasyna qatysýshylar QHR-daǵy AQSh elshisi Gerı Lokkanyń kóligin qorshap alyp, oǵan zaqym keltirdi.
Sheteldik BAQ-tardyń habarlaýynsha, kóliktiń ishinde bolǵan amerıkandyq elshi zardap shekken joq. AQSh elshiligi japondyq dıpmıssııanyń janynda ornalasqan, onyń mańynda ótken beısenbiden bastap japondyqtarǵa qarsy narazylyq aktsııalar ótýde.
Sársenbi, 19 qyrkúıek kúni QHR SІM-niń resmı ókili Hýn Leı osy oqıǵaǵa qatysty pikir bildirdi. Ol qytaı úkimeti Dıplomatııalyq qatynastar týraly Vena konventsııasyn qashan da qatań saqtaıtyndyǵyn jáne QHR-da ornalasqan sheteldik uıymdar men olardyń qyzmetkerleriniń qaýipsizdigine kepildik beretindigin atap ótti.
«Oqıǵaǵa qatysty tıisti organdar tekserý júrgizip, qajetti sharalardy qolǵa alýda», - dep atap ótti qytaılyq dıplomat.
Esterińizge sala keteıik, Qytaıda japondyqtarǵa qatysty narazylyq aktsııalary japondyq úkimet 11 qyrkúıekte jeke kásipkerden - japondyq otbasydan 26,28 mln. dollarǵa Dıaoııýdao arhıpelagynan 5 araldyń 3-ýin satyp alǵannan keıin bastaldy. Qytaıdyń bılik ókilderi Japonııadan daýly araldar boıynsha óz sheshimderiniń kúshin joıýdy talap etti.
