QHR-men kelisimdi ratıfıkatsııalaý jáne qoǵamdyq keńester týraly zań jobalary qaraldy
ASTANA. QazAqparat - 13 qazanda Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Qazaqstan-Qytaı memlekettik shekarasynyń rejımi týraly kelisimdi ratıfıkatsııalaý týraly» zań jobasy qaraldy.
2006 jylǵy 20 jeltoqsanda Beıjiń qalasynda jasalǵan Kelisim aýmaqtarǵa qol suǵylmaýshylyqty qamtamasyz etý, quqyqqa qarsy áreketterdiń jolyn kesý, shekaradaǵy tosyn oqıǵalardy sheshý joldaryn belgileý jáne eki memlekettiń shekara ókilderiniń ózara is-qımyl tártibin retteýge baǵyttalǵan. Kelisimdi ratıfıkatsııalaý Qazaqstan men Qytaı arasyndaǵy tatý kórshilik qarym-qatynasty odan ári nyǵaıtýǵa jáne eki jaqty yntymaqtastyqty damytýǵa yqpal etetin bolady.
Komıtet otyrysynda «Qoǵamdyq keńester týraly» zań jobasy da qaraldy. Qujat qoǵamdyq mańyzy bar máseleler boıynsha azamattyq qoǵamnyń pikirin bildirý maqsatynda qurylatyn qoǵamdyq keńesterdiń quqyqtyq mártebesin, olardyń qyzmetin qalyptastyrý jáne uıymdastyrý tártibin aıqyndaýǵa baǵyttalǵan. Qoǵamdyq keńester eki deńgeıde - respýblıkalyq jáne jergilikti deńgeılerde qurylady.
Zań jobasynda Qoǵamdyq keńesti qalyptastyrý tártibi men onyń sandyq quramy, sondaı-aq onyń múshelerine qoıylatyn biliktilik talaptary týraly erejeler kózdelgen.
Qabyldanatyn erejeler memlekettik organdar qabyldaıtyn sheshimderine azamattyq qoǵam ınstıtýttaryn keńinen qatystyrýdy qamtamasyz etýge baǵyttalǵan. Joba qoǵamdyq monıtorıng, qoǵamdyq tyńdaýlar, qoǵamdyq saraptama, memlekettik organdar jumysynyń nátıjeleri týraly esepti tyńdaý sekildi qoǵamdyq baqylaý túrlerin retteıdi.
Odan basqa, komıtet otyrysynda «Qazaqstan Respýblıkasynyń keıbir zańnamalyq aktilerine qoǵamdyq keńester máseleleri boıynsha ózgerister men tolyqtyrýlar engizý týraly» ilespe zań jobasy qaraldy. Bıýdjet kodeksine jáne birqatar zańdarǵa engiziletin ózgerister «Qoǵamdyq keńester týraly» zań jobasynyń erejelerine sáıkes keltirý maqsatynda azamattardyń quqyqtaryna, bostandyqtary men mindetterine qatysty máselelerdi retteıdi.
Zań jobalary Palatanyń qaraýyna jiberildi.
