QHR men Qazaqstan úsh zulymdyqqa qarsy shyqty - Nursultan Nazarbaev
«Qytaı Halyq Respýblıkasynyń basshylyǵy úsh zulymdyqpen - ekstremızm, terrorızm jáne separatızmmen kúres boıynsha usynys tastady. Biz bul usynysty qoldaımyz jáne birlese jumys istep jatyrmyz», - dep atap ótti Prezıdent óz suhbatynda.
Prezıdenttiń aıtýynsha, terrorızm Sırııada anyq baıqaldy jáne IGIL terrorızmniń naǵyz zulymdyq ekenin, munymen kúresý qajettigin kórsetti.
«Onda Amerıka bastaǵan bir koalıtsııa jáne Reseı bastaǵan taǵy bir koalıtsııa kúresti. Qazir olardyń ózderi ataǵan «memleket» joıyldy, terrıtorııasy joq, biraq óz sodyrlaryn Aýǵanstan syndy ózge óńirlerge jiberip jatyr. Bul bizdi qatty alańdatady. Munymen kúresý úshin Shanhaı uıymyna kiretin Ortalyq Azııa elderi birge jumys isteýi kerek. Qazir de osymen aınalysyp jatyrmyz», - dedi N. Nazarbaev.
Sondaı-aq, Elbasy Qazaqstan tarapynan Aýǵanstanǵa aýqymdy kómek kórsetilip jatqanyn aıtty. Aýǵanstan jastary Qazaqstan qarajaty esebinen bilim alýda. Ondaǵy halyqty jumyspen qamtý úshin Qazaqstan áleýmettik jáne ınfraqurylymdyq nysandar salýǵa daıyn.
«40 jyldan beri Aýǵanstanda azamattyq soǵys júrip jatyr. Halyq soǵysýdan basqa eshteńe bilmeıdi. Terrorızmdi qarjylandyratyn esirtki óndirisimen aınalysady. Munymen qalaı kúresý kerek? Halyqqa jumys berý kerek, ol úshin Aýǵanstandaǵy óndiristi damytý qajet. Mine, bizdiń ortaq mindetimiz - Aýǵanstanǵa óz ekonomıkasyn qalyptastyrýǵa kómektesý», - dep óz sózin túıindedi Prezıdent.
Aıta keteıik, Qazaqstan Prezıdenti Nursultan Nazarbaev Qytaıdyń CCTV telearnasyna suhbat berdi. Suhbat barysynda Memleket basshysy Qazaqstan men Qytaı arasyndaǵy yntymaqtastyqqa, sondaı-aq «Nurly jol» jáne «Bir beldeý, bir jol» baǵdarlamalarynyń toǵysý aıasyndaǵy ekijaqty yqpaldastyqqa qatysty saýaldarǵa jaýap berdi.
