QHR Memlekettik keńesiniń premeri: Qytaı Lıanıýngan qalasynda ShYU logıstıkalyq parkin qurýǵa ázir

ChJENChJOÝ. QazAqparat - Qytaı múddeli taraptarmen birlesip «Qytaı-Eýropa» konteınerlik poıyzyn paıdalaný tıimdiligin arttyrýǵa, sondaı-aq Lıanıýngan qalasynda ShYU-ǵa múshe memleketterdiń qatysýymen halyqaralyq logıstıkalyq park qurýǵa ázir. Bul týraly ShYU-ǵa múshe memleketter úkimetteriniń basshylary keńesiniń 14-shi otyrysy barysynda QHR Memlekettik keńesiniń Premeri Lı Ketsıan málimdedi.

«ShYU-ǵa múshe memleketter Eýrazııalyq qurlyqtyq kópirde, basqasha aıtqanda, Azııa men Eýropany biriktiretin negizgi qurlyq jolynda ornalasqan. Sondyqtan olardyń biryńǵaı kóliktik-kommýnıkatsııalyq jeli qurý boıynsha áleýeti zor. «Eger jol ashyq bolsa, onda baılyqqa esik te solaı ashyq bolady». Óńirlik kólik-kommýnıkatsııalyq jeli qurý - ShYU-ǵa múshe memleketterdi ekonomıkalyq damytýdy jedeldetýdi qoldaý», - dedi ol.

Lı Ketsıan uıym aıasynda halyqaralyq avtomobıl tasymaly úshin qolaıly jaǵdaı qurý týraly kelisimge qol qoıylǵanyn eske saldy.

Eske sala keteıik, ShYU ÚBK-de qazaqstandyq delegatsııany QR Premer-Mınıstri Kárim Másimov basqaryp bardy. ShYU-ǵa múshe memleketter (Qazaqstan, Qytaı, Qyrǵyzstan, Reseı, Tájikstan, Ózbekstan) ókilderimen qatar úkimet basshylary sammıtine baqylaýshy elder: Aýǵanstan, Belarýs (alǵash ret), Úndistan, Iran, Mońǵolııa, Pákistan delegatsııasy shaqyrtyldy.