QHR Elshisi qytaılyq bıznesmendi qutqarǵan polıtseılerge alǵys aıtty
Qazaqstandyq polıtsııaǵa adam urlanǵany jónindegi habarlama Qytaı Halyq Respýblıkasy elshiliginen kelip tústi. Qytaılyq bıznesmenniń 37 jastaǵy jubaıy osy elshilikke kómek surap júgingen eken.
Áıeldiń aıtýynsha, oǵan belgisiz bireýler telefon shalyp, kúıeýin urlap ketkenderin habarlap 400 myń ıýan (22,5 mln teńge) talap etken.
Qylmysty ashý maqsatynda Almaty qalasy Polıtsııa departamentinde jedel-tergeý toby quryldy. Alǵashqy mınýttardan bastap polıtsııa qyzmetkerleri barlyq qajetti jedel jáne arnaıy is-sharalardy júrgizdi. Nátıjesinde kúdiktilerdiń jeke basy anyqtaldy.
Sál keıinirek polıtsııanyń jedel qyzmetteri arnaıy bólinis jaýyngerlerimen urlanǵan adamdy qutqarý boıynsha operatsııalar júrgizdi.
Qylmysqa qatysýshylardyń barlyǵy ustalyp, qamaýǵa alyndy. Olardyń ár qaısynyń mindeti tergeýmen anyqtalatyn bolady. Qazir olardyń ózge qylmystarǵa qatystylyǵy tekserilýde.
«Qazaqstan úkimetine, ishki ister mınıstrine, Almaty qalasynyń polıtseılerine meniń jubaıymnyń kómek suraǵan ótinishine kóńil qoıyp, meni jedel qutqarǵandary úshin úlken rahmetimdi aıtamyn. Іstiń osylaı tez sheshilgenine men óte qýanyshtymyn. Qytaı Halyq Respýblıkasynyń elshiligine de arnaıy alǵysymdy bildiremin. Men Qazaqstanǵa mindetti túrde taǵy kelemin. Munda adamdardyń qaýipsizdigi birinshi orynda turǵanyna kózim jetti», - dep rızashylyǵyn bildirdi jábirlenýshi bıznesmen.
Búgin Qytaı Halyq Respýblıkasynyń Qazaqstandaǵy Tótenshe jáne Ókiletti elshisi Chjan Sıao Qazaqstan Respýblıkasy ІІM-ne arnaıy kelip, mınıstrdiń ózine jáne barlyq polıtsııa qyzmetkerlerine urlanǵan Qytaı azamatyn taýyp, qutqarǵany úshin alǵysyn bildirdi.
Ol bul istiń táýlik ishinde tez ashylǵanyn estigende, tań qalǵanyn jasyrmady. Elshi qylmysty ashýǵa qatysqan ІІM-niń barlyq qyzmetkerlerine óziniń alǵysyn aıtyp, bul qazaqstandyq polıtsııanyń kásibıligi men joǵary jaýapkershiligin kórsetetinin atap ótti.
Chjan Sıao óz sózinde eki eldiń quqyq qorǵaý organdary jelisi boıynsha jemisti yntymaqtastyq bolatynyna senim artyp, bul yntymaqtastyq qos memleketke jáne onyń halqyna tıimdi bolatynyn jetkizdi.