QHR-dyń basqarý júıesi túbegeıli ózgerdi
BEIJІŃ. QazAqparat - 13 shaqyrylymdaǵy halyq ókilderi Jalpyqytaılyq jınalysynda QHR konstıtýtsııasyna túzetý engizý jobasy maquldandy, dep habarlaıdy «QazAqparat» HAA Qytaıdaǵy menshikti tilshisi.
Daýys berýge 2 964 halyq qalaýlylary qatysqan jáne onyń 2 958-i Qytaı kommýnıstik partııasynyń Ortalyq komıteti usynǵan konstıtýtsııaǵa túzetýlerdi maquldaǵan, 2 adam qarsy shyǵyp, 3 daýys berýden bas tartqan jáne 1 bıýlleten jaramsyz bolyp shyqqan.
Eske sala ketsek, 25 aqpan kúni QKP Ortalyq Komıteti el konstıtýtsııasyna ózgerister engizý boıynsha usynys jarııalaǵan edi.
QHR negizgi zańyna Sı Tszınpınniń jańa dáýirdegi qytaılyq erekshelikteri bar sotsıalızm, qytaı ultynyń uly jańǵyrýyna qol jetkizý jáne ekoórkenıettik qurylys túsinigi týraly ıdeıalary engiziledi.
Jańa túzetýlerge sáıkes, memlekettik qyzmetshiler qyzmetke kiriserde el konstıtýtsııasyna qoǵam aldynda ant beredi jáne QHR memlekettik organdar júıesin baqylaý retinde Ulttyq komıssııa engiziledi.
Tarıhı máni bar negizgi túzetýlerdiń biri - QHR tóraǵasy men tóraǵa orynbasaryna eki merzimnen artyq bılikte bolýyna tyıym salatyn 79-baptaǵy úshinshi tarmaqty alyp tastaý boldy. Bul QHR kóshbasshysy Sı Tszınpınge 2023 jyldan keıin de bılik basynda qalýyna múmkindik beredi.
Eske sala ketsek, 2017 jyldyń qazan aıynda Qytaı kommýnıstik partııasynyń 19-sezinde Sı Tszınpınniń esimi Den Sıaopın jáne Mao Dzedýnmen qatar Qytaı Kompartııasynyń jarǵysyna engizildi.
QHR alǵashqy konstıtýtsııasy 1954 jyly qabyldanǵan. Onyń qazirgi mátini 1982 jyldyń 4 jeltoqsanynda bekitildi. Sodan beri atalǵan qujatqa tórt ret túzetý engizilgen.
Avtor: Sadyq Akıjanov
Glav.foto: russian.news.cn
Foto: REUTERS/Jason Lee
