QHR-dan Almatyǵa jetkizilgender karantınnen shyǵaryldy
Qoǵamdyq densaýlyq saqtaý basqarmasynyń baspasóz qyzmetinen málim etkendeı, statsıonarda evakýatsııalanǵan stýdentterden bólek, úsh otbasylyq jup, 9 jáne 6 jastaǵy eki bala boldy. Olardyń aýrýhanadan shyǵar kezdegi jaǵdaıy - «qanaǵattanarlyq».
Qala ákimdigi aýrýhanadan shyqqandardy baratyn jerlerine jetkizip salý úshin 14 avtobýs bóldi.
Almaty qalalyq Densaýlyq saqtaý basqarmasy basshysynyń mindetin atqarýshy Tileýhan Ádildaevtiń aıtýynsha, statsıonarǵa jatqyzylǵandar úsh táýlik boıy medıtsınalyq qyzmetkerlerdiń baqylaýynda boldy. Koronavırýstyń bar-joǵyn anyqtaý úshin synamalar alynyp, Ǵylymı taldaý ortalyǵyna jiberildi.
Zertteý qorytyndysy barlyǵynda teris nátıje kórsetti. Olar endi turǵylyqty jerleri boıynsha 14 kún medıtsınalyq baqylaýda bolady.
Aýrýhanadan shyǵarylǵan azamattar jyly qarsy alǵandary úshin Úkimetke, QR Densaýlyq saqtaý basqarmasyna, qala ákimdigi men medıtsınalyq qyzmetkerlerge alǵys aıtty.
Qytaıdaǵy Poshta jáne telekommýnıkatsııa ýnıversıtetinde oqıtyn 20 jastaǵy boıjetken de óz oıymen bólisti.
«Ushaqqa otyrǵan kezde bárimizdi bortqa aty-jónimizdi atap shaqyrdy. Dene qyzýymyzdy ólshep, basý aıtty. Bul jaqta bizge túsinistikpen, meıirimmen qaraǵandary qýantty. Ózimizdi otbasymyzda júrgendeı sezindik. Dárigerler men medbıkeler erjúrektilik tanytqany tańǵaldyrdy. Olar vırýs juqtyryp alamyz dep qoryqqan joq. Bastapqyda bizdiń emotsııalyq jaǵdaıymyz turaqsyz bolǵandyqtan, bizben psıholog jumys istedi», - deıdi Marına Potapova.
Eske sala ketsek, 2020 jyly 13 aqpanda Almatydaǵy halyqaralyq áýejaıǵa Qytaıdan reıs keldi. Bortta 211 adam bolǵan, onyń 171-i Qazaqstan azamaty bolsa, 40-y – qyrǵyzstandyq. Keıin Qyrǵyzstan azamattary óz elderine jetkizildi.